Columns

Column Modertaal: HEIT door Frits Criens

Midden Limburg

De vèsboer waas drök doondje väör ziene hanjel good in te richte. Mesjien waas het vèt nog neet werm genóg, het doerdje in eder geval ein pueske väör de iërste klantj aan de bäört waas. Vlak väör mich sjtóng eine aojere man in eine rolsjtool. Hae waas de derdje in de rie. Ich sjtóng achter de vrouw die nao hem aan de bäört waas. Ze bekeek de man mèt väöl belangsjtèlling. Hae haaj ein oranje veiligheidsvest aan. Dao ónger droog hae eine laere jack en äöver ziene sjoeët loog ein fleece daeke mèt Mondriaan-motief in roeëd, blauw en wit. Het zoog vrolik oet. Mesjien keek de vrouw dao mèt zoeëväöl aandacht haer. Ze baog zich nao hem haer en vroog: 'Ich höb d'r niks mèt te make, mer höbtj gae het neet te werm? Zal ich angers die daeke effe opvaoje?'

 

Ich begreep die bezörgdjheid. Het waas bloodheit en het zooj nog wermer waere, volges de waerberichte. De man probeerdje zich nao de vrouw te drejje. Die zoog  zien probleem en ging naeve hem sjtaon. 'Zal ich uer daeke opvaoje?' herhaoldje ze häör vraog. 'Het is zoeë heit hie.' Ich zoog drek det de miens neet gedeendj waas van det aanbod. Hae zag in eder geval tamelik krebbig: 'Het is gaaroets neet heit.' De vrouw sjròk van zien toeën en zag: 'Ich wool uch allein mer helpe, väör het geval det.' 'Doe wèts neet waat heit is, maedje. Bèn ouch mer blie det se det neet wèts.' De vrouw haaj allang sjpiet van häör aanbod, zag 'sorry' en zat eine traej nao achter.

 

Óngertösse waas de vèsboer vaerdig mèt zien väörbereidinge. Ziene aanrecht loog vol gepanneerdje sjtökke vès, lichtelik geine deure kabeljauw, mer goodkoupere koolvès. In eder geval klaor väör gebakke te waere in het vèt det óngertösse op de juuste temperatuur waas gebrachtj. 'Nou, jónges,' zag de vèsboer, terwiel hae de sjtökke vès in de frituurpan leet zakke: 'Wae gaon zjwumme.' De man in de rolsjtool, drejdje zich ein bietje opzie en zag taege de vrouw: 'Wils se weite waat heit is? Dan sjpring dao mer achter aan.'

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.