Toevallig huerdje ich as kindj emes bewaere det sommige miense mèt de helm op waere gebaore. Ich zal ein jaor of tiën zeen gewaest en vónj het ein raar opmerking. Ich wis det kinjer oet de boek van de moder kwome. Wie ze dao in terecht kwome en wie ze d'r weer oet móste, dao haaj ich gein flauw benul van. Ich kós d'r mich ouch niks bie väörsjtélle. Wie het d'r bie maedjes ónger aan de boek óngevier oetzoog, haaj ich waal gezeen bie mien zösterke det zès jaor jónger waas. Mer kós dao eine baby oetkómme? Ouch nog mèt eine helm op? Eine vrindj van pap haaj eine motor en droog eine helm. Det waas ein sjevaak zoeë groeët wie ein flink vleiskèlle. Mèt zón dink op het köpke zoje kinjer oet de boek van häör moder kómme? Woeëväör haje ze dae helm troewes op? En woeë bleef dae helm nao de gebaorte? Ich haaj nog noeët eine baby gezeen mèt zón dink op de kop.
Groeëte miense kóste mich väöl wiesmake, mer dit ging te wied. Ich waas neet gek. De opmerking leet mich neet los. Sangerdaags begós ich d'räöver taege mien vader. Hae zag det het waor waas, allein waas het geine echte helm. Waat het waal waas, wis pap ouch neet. Eigelik waas het miër ein maneer van zègke. Eine baby dae mèt de helm op waertj gebaore, kintj väöl gelök verwachte in zien laeve. Det zeen mer hiël weinig miense. Det lètste kloptj, weit ich noe. Mer ein op de 80.000 kinjer waertj mèt de helm op gebaore. Dan braeke de vlieze van de moder neet ónger het bevalle.
Mien moder is op häör zeve-ensestigste door eine brómmer klaats van häöre fiets gereje. Mam haaj waal hiel väöl pech. Ze sjloog mèt de kop taege de gróndj en waas op sjlaag doeëd. Ich weit het neet zeker, mer ze waas dink ich, neet mèt de helm op gebaore en misdje het gelök det häör haaj kinne redde. Mèt de besjerming van eine echte helm haaj ze det gelök lichtelik ein hendje kinne helpe.
2024, waek 39
