Ich haopdje det de herrie door blanke fans van zjwarte Piet zich haaj gelagdj. Die discussie waas troewes begós door dónker miense die vónje det de knecht van Sinterklaos ein symbool van racisme en sjlavernie is. Dao wore väöl witte Nederlenjers het mèt èns. Det is häör good recht. Door häör ouge bekeke kan ich mich óngertösse get bie häör redenering väörsjtèlle, al höb ich in zjwarte Piet noeët eine slaaf gezeen. Piet mós door de sjaorsjtein nao binne väör pekskes aaf te levere. Dus zitj hae ónger het root. Ich wis as kindj neet baeter. Mer ja, as dónker miense zich door zjwarte Piet weggezatte veule as sjlaaf, accepteer ich det Piet van kläör verangertj. Zoeë principeel is die kläör väör mich neet en de kado's waere d'r neet minder van. Samelaeve beteikentj gaeve en neme.
Toch veule väöl fans van zjwarte Piet zich door die kläörsverangering nog altied weggezatte as racist. En dao wille ze neet mèt vergeleke waere ómdet ze det nao eige zègke neet zeen. Dus blieve ze principieel vasthaoje aan de kläör zjwart die väör häör ónsjöljig is en niks mèt racisme haet te make. Ouch det is häör good recht. Allein is ein klein deil van die fans zoeë fanatiek det ze häör geliek mèt dreigemente en geweldj wille binnehaole. In Yerseke is de inkómst van Sinterklaos óm die raeje zelfs aafgelastj. Mesjien mótte die herriemaekers èns ein jaor mèt de Piete mèt nao Sjpanje. In eine toegekuipdje kaolezak. Väör te liëre det samelaeve ein kwestie is van gaeve en neme.
De Limburger sjreef pas det Vènlo door zjwarte Amerikaanse soldaote is bevriedj. Väör ein good begip, det wore kinjer woevan de aojers of in eder geval de groeëtaojers nog sjlaaf wore gewaest van blanke Amerikane. En toch kwome ze mèt gevaor väör eige laeve vrieheid bringe in het blanke Vènlo. Wore dao toen gein miense die principieel get taege miense mèt ein dónker hoedskläör haje? Of wore ze d'r waal, mer höbbe ze besjaamdj gezjwege? Laot die paar gekke die de Sinterklaos väör kinjer verzouwe, det vanaaf noe dan ouch doon, estebleef.
2025, waek 48
