Sinterklaos zoot mèt eine kater. Het waas al begós bie het vertrèk in Sjpanje. Väör discriminatie taege te gaon, waerdje zien zjwarte Piete in Nederlandj gediscrimineerdj. Ze wore gewuen neet mier welkom. Dus haaj hae zien bèste knechte thoes mótte laote. Hae kós die jónges toch neet wit vèrve vanwaege ein paar moelemaekers in Hollandj. Det die zichzelf mer ein anger kläör gove. Het bezeuk aan Nederlandj waas eine lange leideswaeg gewaore. Anger jaore kreeg hae ein fiëstelike óntvangst. Doezendje kinjer sjtónge hem op te wachte, zónge väör hem en zjwejdje mèt vlegskes. De tillevisie en de radio wore d'r bie.
Dit jaor waas hielemaol niks väör hem geregeldj. Wie eine deef waas hae het landj in gekómme.
Hae haaj gein hendjes hove te sjödde. Waas mèt nemes op de foto kinne gaon. Haaj gein 'beminde gelovige' geröstj kinne sjtèlle. Nederlandj mós hem neet mier, ouch neet zónger zwarte Piete. Det deej pien. Officieel waas hem gezagdj det het vanwaege de pandemie waas. Hae gluifdje d'r niks van. Corona waas ein sjmoesje väör zjwarte Piet väörgood de nek óm te drejje. En ouch väör hem oet de buurt te haoje van klein kinjer. Dao wore zat miense die det ouch zoeë zoge. Mer mós eine heilige busjop het misbroek van anger geistelike misnete? De middesjtandj haaj zien fiëst al laote valle en ingeruuldj väör Black Friday. Waas dae naam dan gein discriminatie? Friday waas de dónkere knecht van Robinson Crusoë.
Maete mèt twië maote, dao wore ze in Nederlandj good in. Muziekvereiniginge en horeca die häör coronazake in orde haje, mochte niks. Mer in winkelsjtraote en koupcentrums trok nemes zich get van coronaregels aan. Det sjtaaldje nörges op. Ein wicht van amper achttiën jaor angerhalf miljoen euro sjtoeke ómdet het prinses is. Det kós waal. Mer burgers häör geldj trökgaeve det de belasting van häör haaj gesjtaole? Det kós neet. Sinterklaos begós zich op te riete. 'Ich hang het paerd aan wilge,' dach hae. 'Ze bekieke het zich mer in Hollandj. Det zal ich mörge aan ederein twittere. Mer ierst besjtèl ich mich eine rollator ... bie de kerstman.'
2020, waek 50
