Ich zat mich in de wachtkamer van het zekehoes taegeäöver twië jóng dames. Ze zote drök te kalle. Óm de angerste sjtool sjtóng op ein blaad te laeze det se op die plaats neet mochs zitte. De dame mèt ein piercing door häör tóng zoot op zón blaad det links ónger häör vot oetsjtook. Het leek mich zón type det ekstra de bördjes mèt "Verboden toegang" opzeuktj, väör dao dan mèt eine opgesjtaoke middelvinger door te loupe. 'Ich höb nötte pien en last van knoebele,' klaagdje de dame mèt de gouwe rink door de naas. Ze drökdje häör henj taege de lieze, asof dao het probleem zoot. 'Het zeen net megawratte die mèt kei hel wortele in mien vleis sjtaeke. Ich hoof mich mer te bewaege, of het sjuutj d'r in. Ich waer d'r krebbedetsig van. Ich kin niks. En as het gein pien duit, jäöktj het versjrikkelik.'
'Eine gezónje jäök is noeët eweg,' wis de dame mèt de tóngpiercing. 'Danke,' sjnebdje de naasrink. 'Det zaet Rico ouch. Dao bèn ich vèt mèt.
' Ze duudje häör henj sjtevig taege häör óngerlief, asof ze de pien d'roet wool perse.
'Ich veul mich net ein aod wief. Rico is d'r neet blie mèt, det sjnaps se waal. Det is d'r eine van ***. Precies ziene aoje, volges mien sjoeënmoder.' 'Dachs se det dae van mich baeter is?' vroog de tóngpiercing. 'Is zónne naasrink neet lestig mèt sjnoeve as se verkaodj bès? Ich dink det ich mich van ónger ouch ein piercing laot zitte. Ze zègke det het lekker is.'
'As ich aan de pien dink väör det te laote doon, zooj mich de zin äöver zeen,' klaagdje de naasrink. Ze sjödje mèt de baovebein, kneep häör henj tot vuust en zag: 'Woeë blieftj dae dokter? Ich haoj het neet mier.' Ze duudje de henj hel taege häör lieze, asof ze eine acute koliek kreeg. De tóngpiercing keek häör mèt cómpassie aan. 'Woeë zitte die megawratte precies, as ich vraoge moog?' De naasrink zuchdje, trok de henj van häör lief weg en zag: 'Hie. Precies baove op de moes, ónger de doem.'
2020, waek 36
