Sjtèl det we eine middig kóste trökgaon nao de jaore sestig väör vanoet Thoeër, langs de Maas, nao Kessel te fietse. Ein romantiense route door boerelandj. Waat zooj ós dan väöral opvalle? Waarsjienlik det d'r toen óntzettendj väöl kuuj lepe in de weie langs de Maas. Noe zuus se d'r bekans gein mier, dao zeen amper nog boere mèt mèlkvië. En toch mótte die boere het bietje sjtiksjtof det häör biëster producere mèt vieftig of miër procent vermindere. Det beteikentj lichtelik det de hèlft of mier van de kuuj weg mót.
Mer ouch as het vië in gans Nederlandj waertj opgeruumdj, blieve miense mèlk drinke en kiës aete. Dus zulle boere in lenj wie Frankriek of Italië de kans griepe väör häöre viësjtapel oet te breie. Det is gein oplossing mer eine ramp väör het sjtiksjtofprobleem. Want oos boere producere mèt ein koe bekans döbbel zoeë väöl mèlk as de Franse collega's. En bekans drie kiër zoeë väöl as de Italiaanse boer. Dus väör eder koe die hie weg mót, kinne d'r örges angers twië of drie trökkómme.
Op oos fietstocht kómme we bie Hael ouch door Osen, woeë oeët ein kesjtiël loog. Precies hóngerd jaor geleje waerdje in Osen geboewdj aan ein sjloes en ein sjtuw. Zoeë kwoom het det sommige boere aan weerskenj van de sjloes weie haje ligke. Det waas lestig met mèlke. As de sjloes toe waas mós d'r gewachtj waere. Dök mèt gaon en ouch weer mèt trökkómme. Dao haje väöl boere gein zin in. Mèt mèlktuite aan de fiets riskeerdje ze de verbaoje äöversjtaek äöver de sjloesdäöre. Det ging op eine daag bie ein boerepaar good mis. De vrouw -laote we häör hie Neel neume- waas klein van sjtök, mer flink bezatte in de wiedje. Ze kukelje mèt fiets en al het water in. Gelökkig kós de sjloesmeister häör mèt eine enterhaok op de druege trèkke. De boer waas neet al te fien in de móndj. Later mós hae het verhaol in de café dök vertèlle, het waerdje eders kiër sjpannendjer. Mer ein zin bleef hetzelfdje. 'Ich dach g*dverdomme det Neel zooj verzoepe.'
2022, waek 29
