'Waat zoojs doe doon,' vroog ich aan Ellie, 'as emes dich eine dickpic sjtuurdje?' Het bedach zich gein moment: 'Op Marktplaats zitte ónger de rubriek Kattevoor mèt naam en adres van de aafzender d'rbie.' As alle vrouwe det zoje doon, waas het gauw aafgeloupe mèt die vètzakkerie. Zón foto mót natuurlik ein sjtatiefoto zeen, woeë meneer Dick d'r op zien profietelikst opsjteit. As wae as kinjer vreuger väör ein sjtatiefoto móste posere, ging d'r ein hiel ceremonie aan väöraaf. Mam sjtreek mèt de henj de frunsele oet oos kleier en lag ós haor in de sjei. Desnoeëds mèt ein bietje tuf. En dan móste we wie eine paol sjtilsjtaon, de aom inhaoje, neet mèt de ouge knippere en lache nao de fotograaf. En ouch nog hiël blie en gelökkig kieke. Nou, haoj det mer èns vol.
Het werk vreuger van fotograaf, mam en kinjer is noe väör de fotograaf van meneer Dick gans allein. Ich höb mèt hem te doon. Wieväöl sjtatiefoto's mót dae neet make väör hae d'r ein haet woeë hae cóntent äöver is? As d'r al zón foto van ziene meneer Dick te make is. Mèt get fantasie kós ich dao-äöver ein toniëlsjtök sjrieve, mer neet alles waat kan, mós se ouch doon. In feite tèltj det ouch väör kaerels die sjtatiefoto's van häöre meneeer Dick doorsjture aan dames woeë ze ein uigske op höbbe. Neet doon hiëre: gae zitj uchzelf väör jan-mèt-de-korte-achternaam. Ich kan mich troewes neet indinke det ein vrouw van dae ónzin gedeendj is.
Ich probeer mich ouch väör te sjtèlle wie het op het ougeblik bie Overmars thoes is. Doe woors topfoetballer, het publiek droog dich op henj. Later höbs se Ajax opnoew groeët helpe make en weer droge miense dich op henj. Ingelse topclubs wole dich höbbe. En dan dit. Waat zaes se thoes, taege dien vrouw, de kinjer? Taege dichzelf as se in de sjpegel kieks? Alles höbs se vergoeëdj väör ein sjtóm sjtatiefoto van diene meneer Dick. De miense die dich op henj droge, lache dich noe oet. De waereldj is hel en cómpassie is ein vergaete waord.
2022, waek 8
