MÖRGE
Op Trump kins se geine piel trèkke. Ich waas bekans klaor mèt dit sjtökske wie Big Donald inèns weer alle sjteun goof väör Oekraïne. Dao ging miene column. 'Neet weggoeëje, gewuen get aanpasse.' zag Ellie. Hie is het resultaat.
'Waat Trump in ziene kop haet, haet hae neet in zien kóntj,' zag sjpraeker A. 'Dae piktj Greunlandj in. Dao duit nemes get aan: gein verkezinge in Greunlandj en gein NAVO.' 'Trump dreigtj allein mer mèt Greunlandj en Canada,' zag B. 'Zien sjpelke mèt Zelensky is väöl nötter. Het sjmaerig werk in Oeëst-Europa moog Poetin doon. En zelf liëtj hae Oekraïne valle wie eine baksjtein. En zoeë dwingtj hae West-Europa väör Oekraïne te helpe mèt nog miër geldj, nog miër waopes en eige soldaote.
Mer... ouch daomèt haoltj Zelensky het neet taege Poetin. Dae verovertj Oekraïne en kriegtj Polen, Tjecheslowakije, Hongarije en Roemenië d'rbie. Lèt mer èns op. En Amerika piktj de rest van de EU in en dan is West-Europa van Trump. Det höbbe die twië zich allang óngerein geregeldj.' 'En as Poetin achteraaf nog miër wiltj,' vroog ich? 'Dae zooj Duitsland en Oeësteriek ouch waal wille. En Nederlandj, mèt Rotterdam as waereldjhave d'rbie.' 'Daoväör mót de EU hem mèt ein groeët leger van lenj die det wille in Oekraïne al taegehaoje,' repe ze allebei tegeliek. En wae mótte mètdoon.'
'Mètvechte in eine aorlog dae neet van ós is?' vroog ich. Ze vlaoge mich aan, gelökkig allein mer mèt wäörd. 'As wae in Oekraïne neet actief mètvechte, drejje we ószelf de nak óm,' zag A. 'Of wils doe det hie alles waertj platgegoeëdj?' 'Zeker neet,' remdje ich hem aaf. 'Mer wils doe dien kinjer nao het front in Oekraïne sjture? Wils se dao zelf gaon vechte?' 'Nae,' zag A nuetelik, 'mer wèts doe get baeters?' 'Iërst kalle en óngerhanjele mèt Poetin, väör se begins te sjete,' sjtèldje ich väör. 'Óngerhanjele mèt Poetin? Dae kins se nog minder vertroewe as Trump,' reep B. A knikdje. Op advies van Ellie sjloet ich aaf mèt ein knipuigske nao de realiteit: Mörge is in de waereldj van Trump weer alles angers as vandaag.
2025 waek 12
