Waarom moeten we kuis leven? Wij moeten kuis leven: 1. omdat wij ons lichaam niet mogen gebruiken tegen de bedoeling van God: 2. omdat ons lichaam een lidmaat is van Christus en een tempel van de Heilige Geest. Det mós ich op de zèsdje klas van de jóngessjoeël thoes oet de kop liëre. En mèt mich väöl anger kinjer op katholieke sjoeële. Dit waas vraog 488 äöver het zèsdje en negendje gebod. DE CHRISTELIJKE KUISHEID. Alles bie-ein wore het 548 vraoge mèt antjwaord oet de groeëte katechismus. In oos klas controleerdje de meister of ederein geliërdj haaj. Waem gein voldoende haoldje, kreeg sjtraof. Waem zich later neet aan die gebode heel, kwoom in de hèl. Volges mich höb ich die hèl dök geriskeerdj.
Net wie alle anger jónges van mien klas wis ich neet waat ich liërdje. Waat beteikendje 'Christelijke kuisheid'? Waas d'r nog anger kuisheid? En waat waas kuisheid eigelik? Ich vroog het aan de meister, mer aan ziene roeëje kop, zoog ich al det hae zich geine raod wis. Hae adviseerdje mich väör het aan pesjtoeër te vraoge. Dao sjaot ich niks mèt op, pesjtoeër kwoom noeët opdage as hae godsdeenst mós gaeve. Pap en mam lete het ouch aafweite. Ein paar jaor later wie mien hormone actief waerdje, deendje het antjwaord zich via mien lief aan. Ich haaj óngertösse op de hbs äöver de Heilige Augustinus geliërdj. Dae kèrkvader sjrieftj äöver zien jeugd: "As jónge kaerel höb ich God gebaedj: "Gaef mich kuisheid en maotigheid. Mer noe aeve nog neet."
Ich zoot gans op de lien van Sint Augustinus: Kuisheid, mer noe aeve nog neet. Op eine zunjigaovendj sjtóng ich in ein duuster heukske get mèt ein maedje te póngele. Het heel mich de henj vast en vroog: 'Dinks se ouch aan vraog 488 van de katechismus? 'Eigelik dink ich miër aan Johannes 4.1,' antjwaordje ich 'Waat is det?' vroog het noesjierig. 'Waat de Biebel zaet äöver vraog 488,' zag ich. 'Óngerzeuk alles en bewaar waat good is.' Het leet mien henj drek los. 'Det haaj ich iëder mótte weite. Ich volg de Biebel. Óngerzeuk mer.'
2024, waek 49
