Het geweldj op de televisie waas neet väör aan te zeen. Flatgeboewe wore totaal kapot gesjaote. De aanval waas pas opgehaoje. Oet de rame dampdje rouk nao boete. Hie en dao zoogs se vlamme. Het is bekans neet väör te sjtèlle det Ruslandj mèt zjwaor waopes de wueninge in puin sjuutj van miense die niks höbbe gedaon. Die zich ouch neet kinne waere. Det Ruslandj het laeve van gewuen miense wie wae compleet äöverhoup zitj. Allein mer ómdet ze in Oekraïne woeëne. De baas van Ruslandj, Poetin, mót óngertösse waal de meist gehaadje miens van de ganse waereldj zeen. Zooj det Poetin ónversjillig laote?
Väör get frisse lócht leep ich ein paar rundjes door de dónkere haof. Eigelik waas het sjlecht väör de gemoodsröst väör zoeë lang machteloos nao boet geweldj te kieke. Van de angere kantj wils se op de huegdje blieve van het waereldjnoets. As Poetin kerncentrales aanvèltj, is hae tot alles in sjtaot. Wie ich trökkwoom, waas net reklaam op de televisie. Dick Advokaat leet mèt ein sjachrijnig gezicht wete det hae zich neet tot de noewe Käöning Toto wool laote kroeëne. Versjrikkelik det Rutte & co het online gokke in oos landj bie wet höbbe toegesjtange. Wieväöl geldj daomèt verdeendj waertj, kins se waal opmake oet al die ónnuezel reklames väör gokorganisaties. Det sjtraks eine houp miense gokversjlaafdj zeen en nao de kloeëte gaon, dao liektj oos regering sjiet aan te höbbe. Die probleme lostj de zorg waal op, woeë door versjillendje regeringe al jaore flink op is bezunigdj.
Ich sjnap troewes neet det Dick Advokaat zich liëntj väör reklaam äöver gokke. As trainer mót hae bie jóng voetballers gezeen höbbe waat gokversjlaving väör ein elenj is. Zooj hem det ónversjillig laote? Det hae het väör het geldj mót doon, is neet aannummelik. Hae haet op genóg plaatse gewèrktj woeë trainers van zien nivo hiel diek verdene. Dagobert Dick is eine van zien biename, geneumdj nao de geldjwolf in de sjtrips van Donald Duck. In Ruslandj waas Advokaat actief bie Zenit Sint Petersburg en het Russies èlftal. Tösse de oligarche. Det verklaortj die ónversjilligheid mesjien.
2022, waek 11
