Ich höb neet op de PVV gesjtumdj, want Wilders zal de probleme mèt migratie ouch neet oplosse. Väöl miense dinke van waal. Det is häör good recht. En daoväör höbbe ze väör Wilders gekaoze. Ouch det is häör good recht, zelfs as anger kezers det mer niks vinje. In oos land moog ederein namelik väör zichzelf oetmake waem zien sjtum kriegtj. Ouch hooftj nemes zich taege angere kezers väör zien sjtum te verantjwaorde. Nemes moog anger kezers väör häör sjtum ter verantjwaording rope. De probleme die Wilders zooj wille oplosse, zeen neet van noe of gister. Ze begóste bie de gastarbeiders van de jaore sestig en gaon door tot de daag van vandaag.
Ouch noew boetelandjse miense mótte woeëne. De äöverheid parkeertj häör doorein in de ermste wieke in de sjtaej, tösse bewoeëners die het dök zelf al lestig höbbe. De negatief gevolge kintj ederein óngertösse oet de kop. Sjlachtoffers beklage zich kiër op kiër äöver waat d'r allemaol fout geit in häör buurt. Bie sjoeëlbesjture, ombudsman, politie, maatsjappelike zorg, wueningboewcorporaties, radio, tv, politiek, gemaendje, provincie, bie het Riek. Woeë neet? Ze vónje en vinje amper gehuer. Sjterker nog, ze kriege dök te huere det het allemaol aan häörzelf ligktj, det ze discriminere, dinke vanoet häöre óngerboek, boetelenjers hate. De politiek duit waal asof, mer numtj häör klachte neet serieus. Behalve Wilders, in häör ouge. In juni veel het kabinet äöver migratie.
Bie de verkezinge grepe kezers de kans väör te sjtumme op Wilders. Häöre haop op baeter tieje is lichtelik valse haop, mer det zal blieke. As ich good loester, waas die sjtum väör Wilders dök minder taege migrante, mer mier taege partieje die gewuen miense en häör probleme mèt woeëne, ermood, óngerwies etc. al jaore laote sjtikke. Det anger kezers de winst van Wilders versjrikkelik vinje, sjnap ich. Det de partie van Frans Timmermans häör opreuptj väör taege de winst van Wilders te protestere, sjnap ich neet. Is Frans zónne sjlechte verlezer? Of haet hae zien partie neet in de handj? We höbbe gezeen waat Trump mèt zónne oproop aan de Conservatieve in Amerika haet vaerdig gemaaktj.
2023, waek 48
