De vlook van Osen: in Lin en gans de gemaende Maasgouw kalle de miense bekans nörges angers äöver op het moment. En ze mótte nog tot september 2025 wachte väördet ze kinne zeen waat det precies inhèltj. Want De vlook van Osen is de titel van ein groeët aopelócht toniëlsjtök. Det sjpeeltj zich aaf aan de sjtuw in Lin, aan de kantj van Osen. Ein prachtige ómgaeving väör te fietse en te wanjele. Mer ouch ein oetgelaeze plaats väör d'r ein groeët aopelócht sjtök op te veure. Zeker as die sjtuw häöre 100ste verjäördaag veertj. Ich hoofdje neet lang nao te dinke wie mich in 2019 al gevraogdj waerdje of ich det sjtök wool sjrieve.
Väördet ich ein letter op papeer kós zitte, mós ich eine houp informatie bie-ein zäömere. Äöver de sjtuw natuurlik, mer ouch äöver Osen. Gelökkig sjteit väöl op internet en Piet Evers oet Lin voordje mich mèt väöl weetjes. Toevallig haaj historicus Leon Moonen in oze eige Hallo ein sjtök äöver Het verdwene Kesjtiël Osen gesjreve. Osen is de Nederlandse naam, in oos dialect waertj het waord versjillendj oetgesjpraoke. Het buurtsjap ligktj tösse de sjloeze van Hael en Lin. Äöver Kesjtiël Osen, woeë good verdeendj waerdje mèt de opbringste van fruit, gaon prachtige verhaole róndj. Het lètste echtpaar det op het good woeëndje, verkoch het kesjtiël det aan het óngerkómme waas. Det waas neet van waeldje.
Graaf Theodoor goof het geldj helder oet as het binnekwoon. Men fluustertj aan gokke. Theodoor en väöral gravin Emile sjpele in De vlook van Osen op de achtergróndj ein belangrieke rol. Natuurlik kós ich neet alle sappige verhaole äöver häör in het sjtök opneme. Dit beväörbeeldj neet. Emile kaldje vloeiendj Frans en hiel krómp Nederlands. Op eine kiër wool ze in het Nederlands sjtute äöver de proeme van Osen. In häör ónsjöldj zooj ze gezagdj höbbe: 'Er is niks lekkerder dan mijn pruim.' Ich dink det het verhaol örges in ein kroeg in Lin of Hael is verzónne. En dae vlook? Daoväör mótj gae in 2025 nao Lin kómme. Het haet niks mèt proeme te make. Of mesjien toch?
2023, waek 42
