'As we mer èns einmaol van dae corona aaf zeen, kriege we ós normaal laeve trök.' Zón saort zin höb ich dök gehuerdj, róndj de jaorwisseling. Het is noe lètst miërt. De corona is d'r nog, mer we krege ós normaal laeve zoeë good as trök. Jaomer genóg deendje zich drek eine volgendje ramp aan dae ós laeve opnoew op de kop begintj te zitte. De terreur van Poetin taege buurman Oekraïne. De gevolge daovan veule wae ouch. Ich bèn bang det we kómmendj Noejaor taege ein zulle zègke: 'As we mer èns einmaol van dae aorlog aaf zeen, kriege we ós normaal laeve trök.' Det zal dees reis ein lestige bevalling waere. Want al zooj in Oekraïne vanaaf noe neet mier waere gesjaote, de gevolge van de aorlog zeen dan nog lang neet väörbie. Wieväöl jaor zooj het troewes doere väör die zjwaor geplaogdje Oekraïners weer ein normaal laeve höbbe?
En wie zal zón laeve d'r väör häör dan oetzeen? As Poetin wintj, zeen het erm miense. Ich gaon d'r aevel van oet det dae mót passe en zich, nao óngerhanjelinge, tröktrèktj asof hae haet gewónne. Wae krege nao de aorlog Marshallhulp van de Amerikane. Geldj en materiaal zal Oekraïne ouch kriege as deze aorlog väörbie is. Mer nao oos bevrijding waas dit net zoeë belangriek väör ós: väöl nazi-kopsjtökke en häör handjlangers wore bie de capitulatie al doeëd. De meiste angere kwome väör de rechter en krege sjtraof. Daobie leej Duitslandj zjwaor ónger de gevolge van ziene eige aorlog. Det goof de sjlachtoffers in eder geval ein iërste geveul van rechtvaerdigheid. Det is belangriek väör wiejer te kinne.
Of de Oekraïners det geveul van rechtvaerdigheid ouch oeët kriege? Ich bèn bang det Poetin en co zich fluitendj achter häör grens tröktrèkke. Dao kumtj häör nemes haole, want dao zeen kernwaopes. Zónne aafloup zooj waal hiel wriëd zeen. Wie kins se dan as Oekraïner ein normaal laeve opboewe mèt bure die dien landj höbbe plat gebómbardeerdj en ónsjöljige, waerloze burgers höbbe vermaordj? Óngesjtraoftj. Haopelik höbbe alle Oekraïners net zón bezunjer krachte in zich as häöre president, Volodymyr Zelensky.
2022, waek 13
