De Litsberg: van baove aaf gezeen sjteit links eine boum mèt tek äöver het water. Dao zeen ein paar dieke touwe aan gebónje. Kinjer kinne zich van de kantj aaf aan zón touw vastgriepe en ein sjtök äöver de Luebaek sjlingere. Ze höbbe de käös väör midde baove de baek los te laote, of väör drueg nao de kantj trök te slingere. Det sjpel meuktj het kindj in groeëte miense wakker. Zoeë wie in dae opa, ein paar jaor geleje. Dae kós het neet laote väör mèt zien kleinkinjer mèt te doon. Ierst duudje hae häör van de kantj oet aaf, zoeëdet ze net get helder baove het water op en aaf ginge. Mer gauw genóg wole de wichter det opa zelf ouch aan het touw ging hange óm äöver de baek te sjlingere. Natuurlik leet hae zich neet kinne.
Tiën seconde later loog ich lankoet in de Luebaek, as ein mislöktj circusnummer.
De veer klein men haje de groeëtste lol. Het waertj mich nog dök ingewreve. Det ich mich expres leet valle, höbbe ze mich troewes noeët gegluifdj. Ich mós d'r ein paar daag geleje weer aan dinke. Ich keek baove op de Litsberg van het sjaor nao ónger. Ein hoeshaoje mèt drie wichter zoot rechts te picknicke. Links, bie de boum mèt de touwe, waas eine man bezig mèt drie behuerlike hunj. Hae goeëdje sjtekke in het water, de hunj sjtaove d'r achteraan, brachte de sjtekke in ein hou mou trök en keke al weer oet nao de volgendje sjtek.
Het waas ein kapotmaekerie die neet waas vol te haoje. Mer dao haaj dae miens zich inèns get sjlums op bedachtj. Aan ein van die touwe bónj hae eine sjtek vast. Zónger zich extra meug te maken kós hae die lien baove de baek laote sjlingere mèt de sjtek as ein saort iëwige worst väör de hunj. Die kóste neet wachte. De man haoldje oet väör de touw van zich aaf te sjlingere, mer väör hae het kós loslaote, grepe zien hunj het vast. De rest waas comedy capers mèt dees óngertiteling väör de jeugdige kiekers: *@#$%^&*@#$%^&.
2020, waek 22
