29 sep 2020ColumnsFrits Criens

Column Modertaal: THIË door Frits Criens

Midden Limburg

'Thië?' vroog de ober en hae trok zien naas ein bietje op. 'Ich zooj uch koffie advisere. Dae is hie superlekker, dao kómme de klantje ekstra väör.' 'Doot mich toch mer thië,' zag ich. Det ich noeët koffie drink, hoofdje ich dae miens neet oet te ligke. 'Ich vinj het jaomer,' probeerdje de ober nog èns, 'de koffie is hie zoeë lekker. Thië is get väör aoj Ingelse.' Ich tèldje tot tiën en zag: 'Earl Grey, gaer.' 'Ich höb ein thië-box,' zag de ober. 'Kintj gae zelf oetzeuke.' 'Ich hoof neet oet te zeuke,' zag ich. 'Ich wil Earl Grey.' De man knikdje. 'Ich bring de thië-box waal mèt.' Ellie besjtèldje koffie. 'Hiel versjtenjig, mevrouw,' prees de ober en hae keek mich mèt ein sjeif oug aan.

 

Wie hae weg waas, zag de man naeve ós: 'Ich zègk altied mer zoeë: Hie is het good zitte. En woeë het good zitte is, mós ze blieve zitte. Ze vraoge mich waal èns "Woeëväör zits doe hie altied?" En dan zègk ich gewuen: Het is hie good zitte.' Det waas dudelik. Effe later zat de ober ein glaas water väör mich mèt de thië-box. Drie saorte, geine Earl Gray. Het water waas lauw. Ellie kreeg dampendje koffie mèt ein klein glaeske likeur. Ich vroog of zón glaeske neet ouch bie de thië huerdje. 'Det sjmeuktj neet bie thië,' zag de ober. 'Waem zaet det?' vroog ich. 'Ederein,' kreeg ich tamelik sjnebbig trök. 'Bèn ich ederein?' vroog ich. 'Egaal,' kètsdje de ober trök. 'Likeur en thië passe neet bie-ein.'

 

'Gae höbtj groeët geliek,' goof ich toe. 'Dae likeur sjmeuktj neet bie ein half glaas lauw water, zónger de besjtèldje Earl Grey, want dae zitj neet in uer thië-box.' Hae pakdje mien besjtèlling weg en vertrok zónger wäörd. Ellie leet ziene koffie neet kaod waere. Het doerdje effe, mer inèns waas de ober d'r weer. Mèt ein glaas dampendj heit water, ein sjäölke mèt 3 buelkes Earl Gray en ein glaeske likeur. Hae zat het neer, zag 'estebleef' en vertrok. 'Zag ich het neet,' klónk het naeve ós. 'Hie is het good zitte.'

 

2020, waek 40

  

 

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.