As ich aan dit sjtökske begin te sjrieve is het 10 juni, acht oer saoves. Het resultaat is bedoeldj väör de gedrökdje HALLO van 26 juni. En ouch väör de digitale HALLO van eine daag iërder. Sjtraks begintj de oetzjwej-interlandj van het Nederlands Èlftal taege Ieslandj. Maondjig 17 juni mót ich dees tekst inlevere bie de redactie van de HALLO. Mer vanaaf woonsdig 12 juni zeen Ellie en ich ein poeës eweg. Dus ich zal mien verhaol mörge waal mótte aafmake. Het thema van de HALLO is 'zomer'. Noe hoof ich mich dao neet per se aan te haoje, mer dees reis wil ich det waal, ómdet we tot noe toe ein liëlik sjlecht väörjaor höbbe. Laot ich in deze column dus èns väör waerprofiët sjpele, kinne we äöver twië waeke kieke waat ich d'r van gebraoje höb.
21 juni is het begin van de zomer, det väörsjpel ich neet, det is volges de kalender zoeë. Dao is ein aod gezègdje det zaet wanniër we eine ganse zomer mèt sjlecht waer kriege. Väörjaor kaod en naat/ zomer op zien gaat. Dit väörjaor is kaod en naat. En toch dörf ich de verwachting aan det róndj de 21ste juni ein paar flinke periodes van echt aojerwets zomerwaer op komst zeen. Tot dae tied haoje we dit väörjaorswaer, mèt raegel, windj en väöl te liëg temperature. Dao zal bèst eine get baetere daag tössedoor kómme, mer dae mós se mèt ein zaklamp zeuke. De kans det de kómmende viërtiën daag taege de mörge hie en dao lichte nachtvorst óntsjteit, sjloet ich neet oet. Dus het is nog ff op de tenj biete en wachte.
Mer daonao kumtj de zomer in zien vol glorie nao ós haer. Zeker weite. Dus mèt väöl zón, temperature van 25 grade of hoeëger en lang werm aovendje väör boete te zitte. Wie ich daobie kóm? Ich baseer mich weer op eine aoje, bekans vergaete waersjpreuk. Dae geit oet van ein zeldjzaam natuurversjiensel det zich dit jaor haet väörgedaon. Bringt ós het väörjaor hie in Limburg Noorderleech/ bringt ós de zomer zón van Mook tot in Mesjtreech.
2024, waek 26
