Doe heurs sjteeds meer miense die in de zomer lever dön biej hoes blieve. Mit ‘n enorm risico op allesverwoestende bosbrenj in Griekelandj, extreme hittegolve in Zuid-Frankriek of hagelsjtein zo groot wie skippiebel in Italië is d’r weinig meer aan. Bös se eers 36 oer in de auto óngerwaeg nao Sjpanje, löps se dao ’n salmonellavergiftiging op ómdet de paëlla is bedorve door ’n sjtroumsjteuring es ’t gevolg van ‘n noodwaer. Dao waerd nemes blie van. Haols se dich ouch nog de veut aop aan ‘ne zee-egel.
Op vakantie in ’t boetelandj, doe mos d’r mer zin in höbbe. Gein wónjer det d’r sjteeds meer Midde-Limburgers toesblieve.
Doe kins ’t ouch omdreije. Dus desse neet toesbliefs ómdet ’t op anger plaatse väöl te heit of te geveerlik is, mer desse toesbliefs ómdet ’t hiej geweun heel sjoon is. Mien pap en mam blieve al jaore toes in de zomer ómdet ze achterom altied vakantie höbbe. Noe höbbe ze zich dao ouch waal ’n blomeparadies aangelach wo zelfs Adam en Eva nog jaloers op zoue zeen gewaes. Ech waor, de haof van Eden waas d’r nieks biej, zo vol geure en kleure is ’t dao. Gelökkig höbbe ze geine appeleboum. Mer ouch boete de haof van mien pap en mam is d’r genog te zeen en te belaeve.
Aafgeloupe zomer haje veer ós hoes oetgeleend aan twee dames die heel lang geleje in ós hoes gewoondj höbbe. ’t Is dus häör ajershoes. Ze wone noe wied eweg en vonje ’t heel sjoon om as toerist min of meer in häör eige jeugd op vakantie te gaon. Ze höbbe genaote van ‘t verblief, lekker fietse, de dörpkes in de omgaeving bezeuke, heerlik weer euveral plat kalle, al die versjillende dialecte, terrasjes oppe Roerkade. Dit waas baeter as Toscane zeije ze nao aafloup. Eine aod-collega van mich ruult idder jaor häör hoes mit ‘n anger femilie, meistal mit Parisiens die Paries in de zomer wille ontvluchte en dan hiej in Midde-Limburg komme genete van de rös. Gek eigelik det veer hie zelf in de zomer juus weg wille.
Midde-Limburg is eigelik de sjoonsjte regio ter waereld om toes te blieve of om haer op vakantie te gaon asse ’t mich vreugs. Werkelik alles lik hiej om de hook. D’r zeen leuke sjtaej op minder as een half uurke rieje: Weert, Venlo, Remunj en get wiejer Mesjtreech, Maaseik, Haerle, Maasmechele enz. Enorme attracties zoas ’t Designer outlet in Remunj en Toverland in Zerum vlakbie. Doe kins drieve op ‘n lochbedje op ’t water op de Maasplasse, sloepjes hure, wakeboarde op ’n wakebordbaan, mit de róndjvaartboot mit, ’n e-chopper hure in Böggeme, litse oppe Litsberg. Doe kins op meervalsafari, ’n vèspas koupe om barbeel te vèsse op de Roer, nao de forelleviever en nöm mer op.
Daonaeve lik ’t Midde-Limurgs landjsjap bezeijd mit prachtige, al dan neet witte dörpkes vol sjitterdend óngehaoje boerderiekes, hoeves, hoeze, kirke, kefeekes, kesjtele en gank zo mer door. Doe raaks neet oetgenwangeld in ós natuurgebiede ’t Leudal, de Mienwaeg, De Groote Peel, de Beegderhei en op al die anjer sjtterende plekskes. Is ’t dich nóg neet genóg, dan paks se de auto en een half oer later bösse in ’t Heuvellandj. Mis ouch de oefenwedstrijden Fortuna – Racing Genk in Nederweert en VVV- RKSV Nuenen in Ospel neet! Culinair bevinjs se dich troewes in de regio mit de bèste iessalons, ’t bèste Limburgse terras, äöveral geweldig sjpeciaalbeer oppe tap, heerlike Limburgse wiene en meer saorte Limburgse flaai om te keze es pizza’s in Italië!
En waat kins se hiej waal neet allemaol naeve de waeg veur lekkers kriege. D’r zeen genog sjtreekproducte om te prebere. Op vakantie sjtop ich biej iddere kraom naeve de waeg wo get verkoch waerd, mer hie in Midde-Limurg rie ich gek genóg meistal veurbie. Is d’r in ’t boetelandj ’n farmersmertje wo se allein ’s mörges tösse 04.00 en 06.00 verse delicatesses van ’t landj kins kriege, dan raeken mer det ich om 03.45 in de auto ongerwaeg bön. Missjien mot ich mich dao hiej ouch de wekker ens veur zitte.
Ich zèk neet det ich mien twee waekskes Albanië metein gaon annulere, mer miene column haet michzelf waal aan ’t dinke gezatte. Ich weit zeker det de truukreis nao Midde-Limburg dit jaor ouch ’n bietje veult as op vakantie gaon!
