Dao zooj ich nog neet begrave wille ligke. Mèt dae oetsjpraok gaeve miense aan wie negatief ze äöver ein bepaoldje plaats dinke. Äöver Lelystad of Almere beväörbeeldj die as sjtad gein gooj reputatie höbbe. Eine vrindj van ós haaj eine variant op det gezègdje. Hae waas vertegewaordiger gewaest en kwoom väöl in het boetelandj. Óm ein of anger raeje haaj hae het neet gezeen op Belsj. As hae het äöver det landj haaj, zag hae: 'Dao wool ich nog gein sjilderie van mich höbbe hange.' Angersóm besjteit dees maneer van oetdrökke volges mich neet. Ich höb teminste noeët emes huere zègke: 'Panhael, dao zooj ich waal begrave wille ligke.' Of: 'Leivere dao wool ich waal ein sjilderie van mich höbbe hange.' We zègke waal: 'Iërst Rome zeen en dan sjterve' mer neet det we dao dan ouch begrave wille waere. Detzelfdje tèltj troewes ouch väör Napels det dök in de plaats van Rome waertj geneumdj.
Die gedachte kwoom bie mich op wie ich eine bezunjere mail kreeg van eine goje bekindje. Of de computer het bericht neet vertroewdje? De mail kwoom neet gewuen in mien postbös binne, mer in de bös van Óngewinsdje Berichte. Dao kómme doorein allein mails binne van oplichters die mich eine hypotheek wille aansjmaere, goodkoup geldj wille liëne, noew koziene wille verkoupe of verse Oekraïense dames in de aanbejing höbbe. Allemaol bezeikerie dus. Dae bekindje haaj ouch get in de aanbejing. Eine kavel op ein natuurbegraafplaats woeë hae vanaaf wool.
Die plek haaj hae oeët gekochtj, sjoeëns hae nog neet zoeë aod waas. Óngertösse zeen zien inzichte verangerdj en wiltj hae van het lepke gróndj aaf. Het waas dudelik det het neet ging óm winst te make. Hae verköptj de plaats väör eine pries woeë hae verlees op zal lieje. Allemaol hiël integer dus, mer aeve good duudje dae mail mich weer aeve mèt de naas op de feite. Ich weit det we allemaol eine kiër aan de bäört kómme. Mer óm dao noe al ein begraafplaats väör te koupe. Troewes, det lepke grónd ligktj örges woeë ich nog neet begrave zooj wille ligke. Väörluipig.
2024, waek 9
