'Det waas nog echt get väör dich,' zag Ellie. We vele in eine reklameblok dae väöraaf ging aan het programma woeë we nao wole kieke. 'Waat is "nog echt get väör mich"?' vroog ich. 'Die bókse,' zag Ellie. Het filmpke van mister Marvis waas väörbie en ich haaj amper gelètj op al die jóng kaerels die niks angers haje gedaon as door het beeldj sjpringe. 'Wie luipse kangoeroes,' zooj mien vader gezagdj kinne höbbe. Ich kós die reklaam óngerhandj oet de kop. Eine man sjpriktj d'r op ein raar toeën ein tekst bie oet. Zien wäörd blieve wie ein mögk in mien oeëre wriemele. Hie kómme ze, de laezer is gewaarsjuwdj. Ontdek de perfecte shorts van Mister Marvis. Nu in 10 unieke stijlen. Gemaakt in Portugal en verkrijgbaar in 40+ kleuren. Vind jouw perfecte shorts nu op (naam van ein website).
Ich höb de zinne neet ómgezatte in oos dialect, det zooj ich zunj vinje van die sjoeën taal. Ellie haaj de reactie op mien gezicht gezeen. Väör mich te plaoge, zag het: 'Die höbbe ouch lang bókse, huer. Zal ich d'r dich ein besjtèlle väör kómmendj naojaor? Mister Marvis haet kläöre zat die dich aansjtaon.' 'As se det mer neet riskeers,' sjpeeldje ich het sjpelke mèt. 'Ich zeen mich al de ganse daag róndjspringe in zón ADHD- bóks. Trap op trap aaf, äöver plantje en muurkes. Ich waer al dul as ich det zeen. Mèt ein mister Marvis aan dien kóntj geis se wie eine sjprinkhaan róndj,' zag ich d'r flot as sjpreuk achteraan.
'Het zeen waal sjoeën bókse,' heel Ellie aan. 'Nou,' zag ich. 'Doe zuls mer de ganse daag wie eine dulle in zón sjpringbóks mótte róndjvlege. Driekwaart van de mansluuj kan det neet éns. Gein conditie, last van de rögk, opgezatte kneen, ómgesjlage inkele, artrose, reuma, neuropatie, kapotte heupe. Die mister Marvisbóks wiltj väöroet. Sjpringe, vlege, oeëre achterein. Det kan ich neet. Dan zooj die erm bóks mèt zónne hampeleman wie mich zitte te kieke. Det kins se die bóks neet aandoon.' Ellie keek mich dónker aan. 'Aoh nae? De bóks neet. Mich waal dan?'
