Aafgeloupe vriedig, 1 miërt, waas het complimentedaag. Het sjientj det wae in Nederlandj neet good zeen in het gaeve van complimente. Het zooj neet in oze volksaard zitte. Ich haaj juust het idee det wae dök doorgesjlage zeen mèt oos gesjtuut. Väöral taege kinjer. Väör het minste of geringste waere die de hemel in gepreze. As kindj hoofs se allewiel neet väöl te doon väör eine 'kanjer' geneumdj te waere. Het kumtj nog zoeë wied det ein kindj taege zien vader en moder zaet as het ziene jas eine kiër fatsuunlik haet weggehange: 'Gae mótj ouch zègke det ich eine kanjer bèn.' Te väöl complimentere meuktj de kracht van het compliment kapot.
Op ein website äöver complimentedaag sjtóng te laeze det ein compliment allein mer positieve biewèrkinge haet. Mèt ein oetroopteike. Teminste as het oprecht, mèt äöverlègk en integer waertj gegaeve. Het remtj 'frustratie', 'demotivatie' en 'polarisatie'. Want emes dae zón compliment kriegtj, zooj zich gezeen veule en serieus genaome en as miens gewaardeerdj. Det is nog lang neet alles. Ein compliment make of kriege is ouch nog èns good väör het milieu. Want van ein compliment kriegtj de óntvanger gratis energie, 'zuursjtof' in plaats van 'sjtiksjtof.' En det is weer good väör de gezóndjheid. En het wörmtj neet de aerde mer die miensheid op, waertj in vètte letters oetgerope. Wie bezunjer is det, vreugtj de website zich aaf.
Wie ich det haaj gelaeze, mook ik michzelf ein compliment det ich neet halverwaege waas gesjtoptj. Dus det waas ekstra good väör het mileu en waal hiel bezunjer, dach ich content bie michzelf. Alle gekheid op ein sjtekske: natuurlik, ein verdeendj compliment op ziene tied höbbe we allemaol nuedig. Ein waord van waardering duit ederein good. En dao kins se baeter get te royaal mèt zeen as te krinterig. Mer de meiste van de 'väördeile' zeen lóchtfietserie. Väör die fantasie gaef ich de sjriever van die website ein diek compliment väör de groeëtste fantast. In oos dialect haet het waord compliment in het miërvoud nog ein apaarte beteikenis. Ich huer het mien moder al zègke: 'Waat is det eine complimentemaeker!'
2024, waek 10
