Miense zeen omnivore, alles-aeters. Det beteikentj det wae vleis, vès, vruchte en greuntje aete. Maag, derm, gal, alvleisklier en alles waat mèt vertaere van aete te make haet, zeen dao-op aangepastj. Dees sumpel väörsjtèlling van zake mót de mediese waorheid óngevier dèkke. Liëwe of wolve aete allein mer vleis. Det zeen carnivore. En dan höbs se ouch nog herbivore die allein van plantje laeve, geite en giraffe beväörbeeldj. Väöl miense geluive det God det zoeë geregeldj haet. Angere meine det het door de evolutie zoeë is óntsjtange. Mesjien höbbe God en de evolutie allebei de handj d'rin gehadj. Dit is aeve good gein aansjpaoring väör ein noew godsdeenst te beginne. En ouch gein noew politieke partie. Van allebei höbbe we al väöl te väöl.
Väöl miense höbbe last mèt het vertaere van häör aete. Dao kinne weer noew probleme oet voert kómme woeë medicine taege zeen. Ein anger maneer van laeve kan ouch bate. Minder sjtress, mier röst of mier bewaege beväörbeeldj. Ein dieet wèrktj soms ouch. Ein noew dieet woeë ich pas van huerdje is het carnivoor-dieet. Det zooj ein wónjermiddel zeen väör flot aaf te valle, of ein gezónj hoed te kriege en sjterke sjpiere. Ouch höb ich al gehuerdj van emes dae mèt het carnivoor-dieet van ziene hoeëge blooddrök waas genaeze en van zien reumaklachte. Mer het dieet kan nog väöl miër. Internet sjteit vol mèt geneeskundige toepassinge. Ouch mèt waarsjuwinge troewes van dokters en organisaties die zich bezig haoje mèt gezóndjheidszorg.
Ich sjnap die waarsjuwinge. Want miense zeen omnivore, allesaeters. Waat gebäörtj d'r mèt dien lief as se inèns verangers in eine vleisaeter? Want volges het carnivoor-dieet moogs se allein deerlijke produkte aete. Dus vleis, vès, eier en bepaoldje zuvel wie bóter of kiës. Mer absoluut gein greuntje, fruit, grane, note en peulvruchte. Of det gezóndj is? Ich bèn geine dokter, dus det aordeil laot ich gaer aan ederein zelf äöver. Het is waal ein deur dieet, want vleis en zuvel zeen priezig. Mesjien zoeë priezig det se mèt ein modaal beurs mèt zón carnivoor-dieet waal minder mós gaon aete. Logies det se dan aafvèls.
2026, waek 19
