Ein paar jaor geleje sjtóng ich in ein rie aan de kassa van de supermertj. Ein vrouw mèt allein greuntje in häör waegeske begós d'r mèt. 'Ich bèn van erme ozel mèt de auto,' zag ze taege de juffrouw van de kassa. 'Doe kums neet èns drueg op en aaf väör ein paar boeëdsjappe.' 'Sjei mich meug,' veel de juffrouw van de kassa häör bie. 'Ich fiets tiën minute van thoes nao hie. En ich bèn dees week al vief kier naat gewaore.' 'Dan hoek dich mer,' sjnebdje ein oma mèt twië mikke op de erm. 'Het is pas woonsdig.' 'Höbbe ze väör de kómendje daag nog mier raegel väörsjpeldj?' vroog de vrouw mèt de greuntje. De juffrouw van de kasse haaj ein kómkómmer in de handj, mer wachdje mèt aansjlaon. De oma mèt de mikke haoldje häör sjouwers op. 'Ich loester neet mier nao de waerberichte. Dao kries se mer Ingelse zin van.' 'As se de lócht zuus die aan alle kantje baove ós hingtj, raegeltj het tot ougstdaag.' bemeudje eine vutter zich mèt het gesjprek. 'Mer ja, ich gaon gelökkig op vakantie nao Frankriek.' 'Dan neem dich de sjtevele mer mèt,' zag de oma mèt de mikke vengig. 'Ich kreeg gister ein kaart oet Frankriek van oos Bert. "Regen, regen, regen!" Mier sjtóng d'r neet op.' De vutter zjweeg. Óngertösse haaj zich eine man mèt ein krat beer achter aangesjlaote. Ziene raegeljas dröpdje nog oet, mer hae keek of het waer hem niks deej. 'Doe höbs geliek,' betrok de oma mèt de mikke hem in het gesjprek. 'Mèt zón waer sjmeuktj eine pils waal, as se teminste de sjtaof aanmeuks.' Ze mós lache mèt häör eige wäörd. 'Eine pils sjmeuktj mich altied,' antjwaordje de man mèt de raegeljas. 'Waer of gein waer.' 'Mer aeve good, we höbbe nog gein zón gehad,' klaagdje de juffrouw van de kassa. 'Op dees maneer raegeltj de zomer gans väörbie.' 'Dae is allang väörbie,' zag de man mèt de raegeljas mèt ein drueg gezicht. 'Det waas pas nog op het noets? De zomer veel dit jaor veertiën daag geleje, op eine dinsdigmiddig.' 2025, waek 28
