De lètste tied bèn ich hiel populair bie jóng vrouluuj. Ich dink det het väöral kumtj vanwaege de sjtökskes in de Hallo en op facebook. Det höbs se as sjriever. As ich ein jónk vroumes waas, zooj ich ouch gek op mich zeen. Magda Bixman beväörbeeldj sjreef in ein sms-je: ‘Kiek èns, ich bèn naaks.’ Väör te kieke mós ich op eine link nao ein website klikke. Ich haaj geine tied. Mer waas hiel veriërdj mèt ein fan die zoeëväöl meute väör mich deej. En dao bleef het neet bie. Maria Fiorenza leet mich weite: ‘Ich höb raos tepels mèt ein groeët wames.’ ‘Die mót mien columns waal erg good vinje,’ dach ich, ‘det ze mich zón geheim vertèltj. Det haaj ich häör noeët zelf dörve te vraoge.
’ Väör het natuurwónjer te zeen, mós ich ouch op eine link klikke.
Det mós se in alle röst doon, dus ich wachdje mèt kieke tot ich mier tied haaj. Mer ja, as se werk oetsjtèls, huiptj het zich op. Eine daag later leet Nabila Nugroha van zich huere. ‘Ich bèn naaks,’ klaagdje het, ‘en ich wil eine sjterke man höbbe dae mich nao bèd kan begeleide.’ Dan haaj het aan mich natuurlik eine goje. Ich höb get in de wits, wae krege vreuger sjmörges aldaag herste in de pan. Mer ich wool mien werk thoes neet oet henj laote valle väör Nabila in bèd te höffe. Fan zeen van eine sjriever is good, mer doe mós geine gek van Sint Merte make. Dus ich dach: ‘Det Nabila mer zuut wie het zónger mich tösse de lakes kumtj.’
Efeng, net bie het volgende sms-je gister vroog ich aan Ellie: ‘Kieks doe waem det is? Ich bèn mèt het aafwasmesjien bezig.’ Achteraaf gezeen, kwoom det óngelökkig oet, want Renote Spaight zoot mèt ein probleem. Het sjreef: ‘Ich bèn zoeë heit, ich wil seks mèt dich höbbe.’ ‘En?’ vroog Ellie. ‘Geis se nao häör haer?’ ‘Hooftj neet per se,’ zag ich. ‘Het kan ouch hie, bie dich. Kiek zelf mer.’ Of Ellie geine fan van mich is? Het is nog altied aan het kieke.
2021, waek 20
