'Doe wèts väöl äöver väörname,' zag de man. Hae en zien vrouw wore ein sjtök in de dertig. Zuuj waas in verwachting. Ellie en ich zote op ein terras aan de Roerkade. Ich knikdje. Ze pakdje allebei eine sjtool en zatte zich bie ós. Hae wees nao de vrouw en zag: 'Mien vriendin. Oze iërste is óngerwaeges. Ein maedje, det moog ederein weite. Mer noe zitte we mèt de naam. Det is waal ein dingske woeë we ós äöver sjtraevele. Mesjien kins doe ós helpe.' Ich wool al zègke det ich mich dao lever neet mèt bemeudje. Want ich zooj het altied väör eine van die twië fout doon. Mer de vriendin waas mich väör.
'Ich wil oos dochter eine orzjinele blomenaam gaeve,' zag ze. 'Eine naam dae nog nemes haet.' 'Dao bèn ich mèt akkaord', óngerbrook de man häör. 'Ich haaj al langer eine sjoeëne naam in gedachte,' ging de vriendin wiejer. Dus höb ich het gans internet aafgezóchtj, of dae naam al bezatte is. En ich höb nemes gevónje mèt miene druimnaam.' 'Vinjs doe det gek?' veel de man de aansjtaondje moder in de raeje. 'Waem neumtj zien kindj ouch Forsythia. Nao ein gael bloom woeë se pien van aan de ouge kries.' Zuuj keek hem ein bietje getraoje aan. 'Det zaes dich. Ich vinj gael ein kläör woeë ich blie zin van krieg.' Ze keek mich aan: 'Waat vinjs dich?'
Ich zooj mien dochter neet wille opzale mèt de naam Forsythia. Mer ich huer zoeëväöl vraemdje kinjername det ich nörges miër van opkiek. As ich zag det ich vieftiën jaor geleje al ein sjtudente in de klas haaj die Forsythia heet, waas het probleem väör allebei opgelostj. Mer ja, mós ich daoväör lege? Ellie zoog mich twiefele. 'En eine orzjinele blomenaam in oos dialect?' vroog het. 'Höbtj gae dao al èns aan gedachtj?' 'Beväörbeeldj?' vroge de man en zien vriendin tegeliek. Ze wore blie mèt het noew idee, det waas dudelik. 'Eine unieke, bezunjere en apaart naam,' zag Ellie geheimzinnig. Het wachdje aeve: 'Bloom of Bleumke.' Noe kiektj Ellie aldaag in de gezèt de gebaorte-advertenties nao.
2025, waek 16
