Column Modertaal Frits criens: 'WINSE'

Leudal

Ellie en ich keke de verkuiper mèt groeëte ouge aan. Hae sjtóng d'r gelektj op, ein bietje verwiefdj. Ziene sjedel glóm wie eine opgeboende vloer in de zón. Ich sjadje hem taege de fieftig. In alles waas het eine ervare vakman mèt plezeer in zien werk. Hae haaj mich net ein deur äöverhaemdj verkochtj. Logies det hae dao vergöldj mèt waas. Mer väör dan drek te doon asof we familie wore, ging waal erg wied. Hae wool namelik van ós weite of we nog sjpeciaal winse haje väör het noew jaor. Hae maendje het hiel serieus. Wie we get lang wachdje mèt oos antjwaord, zag hae: 'Begriep mich estebleef neet verkierdj.

 

Ederein zaet: "De bèste winse." Det vinj ich hiëlemaol niks. Ein laeg dueske, neum ich det. Dus as gae noe beväörbeeldj gezagdj haadj: "We wille gaer ein cruise door de Cariben make," haaj ich gezagdj: "Nou mevrouw, meneer, ich wins uch väör 2020 ein geweljige cruise." Det vinj ich noe eine persuenlike wins.' Net wie ich wool antjwaorde det we pas trök wore van zón cruise, waas Ellie mich väör. 'Gae bringtj mich op ein idee.' Ich zoog de buuj al hange. Haaj ich mer neet in de etalaasj gekeke. Dan waas ich d'r ouch neet nao binne gegange. Ich mook mich al op de däör op-aan wie de verkuiper taege Ellie zag: 'Woeëväör neet? Ein cruise is harsjtikke leuk höb ich gehuerdj.'

 

Ich kreeg Ellie mèt väöl meute mèt nao boete. Väör hem te paje zag ich: 'Dae verkuiper haaj waal geliek. We winse ós het noew jaor in mèt wäörd die eigelik niks zègke. Net wie det ónnuezel verhäölke äöver die cruise,' zag ich d'r ein bietje vals achteraan. Zo'n boeëtreis is sjlechter väör het miljeu as Sjiphol.' 'Weit ich,' zag Ellie, 'mer dae miens wool orzjineel zeen.' Ich trok de sjouwers op en zag: 'Det is hem dan good mislöktj.' Ellie pakdje het väör de verkuiper op. 'Wie zoojs doe dien klantje dan op ein baeter maneer Noejaor wille winse?' 'Gewuen,' zag ich, 'orzjineel aojerwets: 'Väör uch allemaol van Ellie en mich ein Zalig Noejaor.'

 

2020, waek 1

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.