Ellie en ich höbbe ein good half jaor eder eine foetelfiets. Het is neet te geluive wie flot se dao-aan wins. Mer dao geit het noe neet äöver. We zeen allebei van hoes oet gaapfietsers. Det beteikentj dat we neet hel rieje en d'r zeker neet op oetzeen väör väöral kilomaeters te make. Ouch neet noe we elektries fietse. We rieje het leefst op oos gemaak door de veljer en kieke róndj. Nao de gewasse, het vië, de veugel, het wildj. Nao de blome in de berm, al zeen det d'r jaomer genóg ein sjtök minder as in oze jónge tied. Fietse door het boerelandj haet ouch as väördeil det se minder anger fietsers taegekums. We höbbe oos noew fietse in versjillendje provincies ingereje.
Fietspaej en röstige veldjwaegskjes zeen d'r zat. Mer het liektj asof die sjmaler zeen gewaore. Ellie zag d'r het iërst get van. Hiël väöl fietspaej zeen mer väör de hèlft van de brèdje te gebroeke ómdet d'r vanoet de berm netele äöverhaer hange. En neet zoeë zunig as se d'r op geis lètte. En woeë gein netele sjtaon zorge braomerte waal väör probleme. Is det ein kwestie van sjlecht óngerhaod? Mesjien, mer neet allein det. Want laote netele en braomerte toevallig plantje zeen die van sjtiksjtof haoje. En sjtiksjtof, dao zitj de lócht vol van. Volges geliërdje kumtj det väöral doordet we väöl te väöl vië höbbe. Minder geliërdje politici weite het baeter en vinje det ónzin.
Örges op de Veluwe fietsdje we de halve daag bekans allein mer tösse maïsveljer en weie mèt Ingels raaigraas. Det greutj hel mer geuftj plantje en kruje die kuuj ouch nuedig höbbe gein kans. Insecte en veugel die daovan laeve dus ouch neet. Ein van de raeje det het sjlecht geit mèt de biodiversiteit, zègke geliërdje. Die minder geliërdje politici dinke het taegedeil. Ouch bewaere ze det allein dees maneer van boere ós allemaol aan het aete kan haoje. Volges geliërdje is det neet waor. Mesjien mótte we die geliërdje en die minder geliërdje politici ein paar waeke op de foetelfiets het landj in sjture väör same te gaapfietse.
2024, waek 41
