Ein good jaor geleje waas het waord Moeder óngerwerp van discussie. Die is ein bietje óngemerktj äöver gewejdj. Vraemdj eigelik, want moder is heilig. Het begós in de waereldj van woke miense. Die vónje det vrouwe mèt het waord 'moder' tekort waertj gedaon. Dao mós ein anger waord kómme. Det is woeë woke miense good in zeen: wäörd die minderhede as discriminatie kinne veule, moge neet miër waere gebroektj. Het waord 'zjwart' väör de gekläördje knecht van Sinterklaos beväörbeeldj. Net wie het waord 'sjlaaf' of 'blank'. Dao kan ich mich nog get bie väörsjtèlle. Mer het waord 'moder' oet de taal sjrappe? Toch waas de Minister mèt de opvallendje Sjoon det van plan. Dao loog al ein wetsväörsjtèl klaor väör het waord 'moder' oet wettekste te haole.
Waat mós dao väör in de plaats kómme? De oplossing pasdje good bie de sjoon van de minister, want ze haaj ein hoeëg vastelaoves-gehalte: Ouder uit wie het kind is geboren. Gelökkig wore d'r nog kamerlede die good oplèdje. Ze brachte het wetsväörsjtèl in het noets, ein paar media vlaoge d'r op en de Minister mèt de sjtoute Sjoon trok ziene käötel in. 'Moder' waas geredj en de 'Ouder uit wie het kind is geboren' ging de voelnisbak in. Toch vraog ich mich aaf wie zón maffigheid in ein wetsväörsjtèl terecht kumtj? Zooj de ambtenier dae zón wettekst sjrieftj dao van te väöre mèt ziene minister äöver kalle? Of zooj de minister thoes instrukties höbbe gekrege van 'Ouder uit wie het kind is geboren-de vrouw?'
As dae ónzin waas doorgegange, wore de probleme pas echt begós. Want probeer dees zin nog mer begriepelik te vertale: De draagmoder goof het wicht aan de biologiese moder die het maedje in de erm lag van zien äövergroeëtmoder. Nou ja, het is gelökkig neet doorgegange. En toch dink ich waal èns: 'As het waord 'moder' waas gesjraptj oet de wet haaj det ouch eine kiër mòtte gebäöre met 'vader.' Waat zoje ze van 'vader' gemaaktj höbbe in Den Haag? 'Ouder met wiens zaad de ouder uit wie het kind is geboren, is bevrucht?' Waat ein gedoons.
2024, waek 8
