20 sep 2022ColumnsFrits Criens

Column Modertaal: GELIEK door Frits Criens

Midden Limburg

Het haet effe gedoerdj, mer noe is käöningin Elizabeth II dan toch begrave. Op het lètst van häör laeve waas ze te aod en te versjlete väör nog zelf de däör oet te gaon, mer dao is nao häöre doeëd get aafgesjleiptj mèt häör. Bie 'belangrieke' miense is det normaal in deze tied woeë uterlik vertoeën de maot is väör verdreet en aanhankelikheid. De media sjtaoke det veurke flink op, want het levertj extra inkómste op. Het gezègkdje det de eine ziene doeëd de angere zien broeëd is, waas nog noeët zoeë waor. Ouch in oos landj höbbe we dae opgefokdje aandacht väör het lètste aafsjied al mètgemaaktj. Pim Fortuyn en André Hazes zeen, zaocht gezagdj, neet ónopgemerktj oet oos midde verdwene. Waat mèt häör gebäördje, waas wichtersjpeel, vergeleke bie het aafsjied van Prinses Diana en käöningin  Elizabeth, toevallig oeët sjoeëndochter en sjoeënmoder.

 

Net eine daag iërder as de Ingelse käöningin, sjtorf mien lètste tante. Wie ich thoes woeëndje waas ze ouch mien buurvrouw. Tante Mie waas nog gein jaor aojer as Elizabeth. Allebei wore ze in de loup van de jaore get kleiner van sjtök gewaore en allebei kóste ze tot tamelik op het lètst nog redelik ónger de veut oet. Prins Philip, de miens van Elizabeth, is in 2021 gesjtorve, net as aome Piet, de man van tante Mie. Ze haje miër gemein, die twië dames. Niet allein ein lank laeve, ouch ein lank deenstverbandj. Elizabeth II waas sevetig jaor käöningin in deenst van the British Empire. En tane Mie waas sevetig jaor getrouwdj mèt aome Piet en in deenst van häör gezin en hoeshaoje.

 

De versjille tösse die twië zeen aevel groeëter as de äövereinkómste. Van tante Mie is zónger väöl bómbarie op ein besjeije maneer aafsjied genaome. Ze zooj neet angers höbbe gewildj. De käöningin waas mesjien ouch lever zónger al dae opgeblaoze poespas begrave. Mer ja, het gezègkdje det we in de doeëd allemaol geliek zeen, haet nog noeët gekloptj, want ouch begrave is miensewerk. Elizabeth en tante Mie wore allebei deep geluivig. Ich haop väör häör det ze väör God waal geliek zeen.

 

2022, waek 38

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.