ColumnsFrits Criens

Column Modertaal, IËRLIK door Frits Criens

Midden Limburg

Op 1 januari zooj mien moder hóngerd zeen gewaore. Het haaj gekóstj, versjillendje zösters van häör zeen ein sjtök tot in de negetig gekómme. En eine van häör breurs kan nog altied de iëw vol make. Wie mam sjtorf waas ze zeve-ensestig en kerngezóndj. Mer op eine kwaoje zunjigmörge is ze veróngelöktj. Zuuj en häöre kleinzoon fietsdje van Roggel nao Haelen. Vlak väör Sint Liezebeth kwome brómmers aan. Väöl te hel, mèt opgeveurdje motors. Eine kós in eine flauwe bocht het sjtuur neet haoje. En det waas het dan. Net väör ze mèt de kop taege de gróndj sjloog, kós mam häör kleinkindj nog mèt fiets en al de berm in duje, angers… Ich mót d’r neet aan dinke, waat ouch nog haaj kinne gebäöre.

 

Pech huertj bie het laeve. Daomèt kins se zón óngelök probere weg te kalle. Väör de jóng dae häör aanreej, waas het ouch eine ramp. Het zal dich op dien zèstiëndje mer gebäöre. Ich höb het hem vergaeve in de haop det oos kinjer noeët zoeë get ergs zooj äöverkómme. Detzelfdje haop ich noe väör mien kleinkinjer. Op noejaorsdaag gaon ich altied effe nao het graaf. Dan geit mich het gans verhaol weer door de kop. De pien is gesjlete, de ónvree äöver het ónrecht blieftj. Ouch ómdet het ónrecht de familie iërder al haaj geraaktj mèt Tante Door, ein zöster van mam. Zuuj en aome Tjeu wore mèt de fiets van Nederwiërt nao Haelen gereje. Het waas boewvakvakantie, tied väör het jaorliks bezeuk aan de familie.

 

Op de trökwaeg gebäördje het. Langs de waeg van Leivere nao Nederwiërt loog nog geine fietsepaad. Eine zaatlap pakdje häör van achter mèt ziene auto en haaj niks in de gate. Drie nichte van mich wore in eine sjlaag zónger vader en moder. De chauffäör waas al dökker veraordeildj, det hae sjtökke mook mèt eine zate kop achter het sjtuur. Det meuktj het extra zoeër. Zón óngelökke paepere dich in det het laeve ein en al risico is. En det het ouch neet iërlik is. We höbbe het te bäöre wie het kumtj. Vraog mer aan Corona.

 

 

2021, waek 2

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.