Jip en Janneke taal gebroeke! Det waas in de jaore negetig het advies. Aan managers. En aan miense oet de politiek. Jip en Janneke zeen ein jungske en ein maedje. Bedachtj door Annie M.G. Schmidt. Ze kalle in korte en begriepelike zinne. Mark Rutte haet het begrip Jip en Janneke taal neet oetgevónje. Waal populair gemaaktj. Väör ein of anger verkezing. Mein ich te weite. Die gemaekelike taal waas nuedig. Kezers begrepe neet woeë ze in Den Haag äöver kaldje. Dus mós het sumpel. Det waas ein drie döbbel belediging. Väör te beginne aan alle Jips en Jannekes van Nederlandj. Die zeen net bezig taal te liëre. Det doon ze op häör nivo. Det is zeker neet sumpel. En al gaaroets neet ónnuezel. En ouch neet gemaekelik.
De raod aan politici väör in Jip en Janneke taal te kalle is ouch ein belediging väör ós allemaol. (Oei, ein lang zin. Haopelik kan de laezer het nog volge.) Väör ós allemaol ein belediging, asof wae kezers ónnuezel zeen. Det zeen we neet. Politici mótte ós serieus numme. Neet allein as ze oos sjtum wille vange. Laot häör in gewuen taal oetligke waat de probleme zeen. Neet in geliërdj abacadabra. Neet in Haags koeterwaals. En ouch neet in vaktaal vol aafkortinge. Zeker neet in sjtiekem boevetaal väör de waorheid weg te lege. Het kostj get miër meute. En vreugtj get miër intelligentie. Talent väör dich in te laeve. Iërlikheid. Oprechtheid ouch. Mer het kan.
Het advies väör Jip en Janneke taal is ouch ein belediging aan politici zelf. Die mótte edere daag weer ingewikkeldje probleme oetligke. Aan anger politici. Aan kezers. Waat te doon mèt sjtiksjtof? Waat is de bèste aanpak väör wueningnoeëd? Probleme in de zorg? Het óngerwies? Det oet te ligke is neet niks. Toch mót het gebäöre. In Jip en Janneke taal? Nae, die taal is neet väör politiek bedoeldj. Jip en Janneke hove gein raekening te haoje mèt häör publiek. Det huere politici waal te doon. De meiste weigere det consekwent. Hoeëgmood? Sjiet aan de miense? Of toch neet zoeë sjlum as ze zich väördoon?
2025, waek 43
