19 apr 2022ColumnsFrits Criens

Column Modertaal: KINNERS door Frits Criens

Midden Limburg

Kwisvraog: wannier en door waem  is de sjtuw in Lin geäöpendj? Antjwaord: in 1925 door Käöningin Wilhelmina. As se door de Linner Waerd nao de angere kantj van de Maas geis, zuus se bie het opkómme van de fietsbrögk de plaquette die toen is ónthuldj. Mich waas det noeët opgevalle. Ich weit het ómdet mich gevraogdj is äöver de boew van de sjtuw ein groeët aopelóchtsjtök te sjrieve. Want Lin wiltj het 100-jäörig besjtaon van de sjtuw groeëts herdinke en vere.

 

Mer 1925 is óm mier raeje ein bezunjer jaor. Op 18 juli 1925 versjeen in Duitslandj het book det ein saort aankondiging waas van WO II: Mein Kampf, gesjreve door Adolf Hitler. Of de  käöningin zich dao toen al dieke bein äöver mook? Ich dink het neet. Vieftiën jaor laoter mòs ze väör Hitler en zien bende vluchte. Toch begrepe sommige regeringe al drek det Mein Kampf neet zoeë mer ein ónnuezel beukske van eine sjiljersknecht waas. Ein paar maondj later al sjlaot de Duitse regering mèt Ingelandj, Frankriek, Italië en Belsj het Verdraag van Locarno. Daomèt sjproke die lenj aaf det ze óngerein de vrede zoje handjhave. We weite waat det verdraag waerd waas wie de nazi's einmaol aan de macht kwome.

 

Poetin leet de waereldj dökker as èns weite det hae druimtj van ein groeët Ruslandj. In 2014 pikdje hae de Krim in en sjtökke van de Donbas. Väöl westerse 'kinners' zagte det het dao waal bie zooj blieve. Regeringe gove Poetin mèt ein geröstj hert macht door zich aafhankelik te make van zien gaas. BN'er en historicus Maarten van Rossem mook zich, de aovendj väör Poetin Oekraïne binneveel, op de tv nog belachelik door op hoeëge toeën te bewaere det Poetin noeët aorlog zooj beginne. We weite òngertösse baeter. Noe verklaore westerse 'kinners' det Poetin gein belang haet väör WO III te beginne. Teminste, as wae dae goje Vladimir in Oekraïne laote gewaerde. In lenj die de Rus kinne, dinke ze dao gans angers äöver. Ich bèn geine kinner, zeen waal waat Poetin in Oekraïne oetvritj. Ich dink det ich mörge mer vottepapeer gaon hamstere.

 

2022, waek 16

 

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.