Ellie is aan het puzzele. We höbbe same waeke lang gerummikuptj. Noe loup ich zelfs mèt het idee róndj väör mien wèrkkamer op te rume. Het is al zoeë wied gekómme det ich mich neet èns geneer väör det op te sjrieve. Kins se naogaon waat de lockdown mèt miense duit. Of het waor is van det echtpaar oet Meijel weit ich neet. Mer het zooj gemaekelik kinne kloppe waat ich höb gehuerdj. Die twië höbbe eine kezelepaad róndj de viever mèt fien, witte kezele. Volges familie die het kan weite, zeen ze al diek twië waeke bezig väör die sjteinkes in ein groeëte badkuup te sjroebe mèt amoniak, zuver te kratse en te wasse mèt greun zeip, tot ze blinke wie noew. Efeng.
Trök nao Ellie. Det haet zich get puzzels aangesjaftj via Marktplaats.nl. Allemaol van doezendj sjtökke. De plaetjes op de doeëze zeen d’r prachtig oet. As se die geis besjtudere, bès se ein oer later nog neet klaor, zoeëväöl is d’r te zeen. Mer as se de toet mèt losse sjtökke ómsjöds, vergeit dich de lol. Eine bóntje toervel van kläöre en vorme ligktj d’r dan väör dich. De mood väör d’raan te beginne zaktj dich in de petoefele. Mer dan mós se doorzitte. En det kan Ellie. Allein haaj het de pech det het de iërste kiër begós mèt het sjoeënste plaetje, mer ouch mèt de lestigste puzzel.
Wie dae iërste puzzel bekans klaor waas, kreeg het hulp van ein paar kleinkinjer. Het is neet te gluive, wie flot het toen ging. Het waas allein jaomer det op het létst ein sjtök óntbrook. We zóchte alles aaf. Ónger de kast loog niks, ónger het taofellake ouch neet. In de toet woeë de sjtöksjes in haje gezaete ouch neet. De mat ónger de taofel ging aan de kantj. Eine van die men ging zelfs op eine sjtool sjtaon en keek baove op de kast. En jawel hoor, dao loog het. Het kindj lachdje zich kepot. We haje hem natuurlik door. ‘Woeëväör höbs se det gedaon?’ vroog Ellie. ‘Ja, oma. Väör alvast te oefene mèt paoseier zeuke.’
2021, waek 11
