Ellie kumtj oet Liëwe, Leve zègke ze dao. Dus ich höb in oze vriejerstied het sjtök van de aoj Ernst Casimir Kazerne nao Liëwe dök aafgelagdj. Het terrein woeë de kazerne loog, huertj noe bie het Outlet. Van dao nao Liëwe is te voot ein hiel inj, deils äöver ein industrieterrein. As se de koupbuit in groeëte tasse mèt mós sjleipe mèt ein paar jengelendje wichter die neet doorloupe, is det ein zjwaor opgaaf. Ich kan mich dan ouch neet väörsjtèlle det Liëwe soms hartsjtikke toe zitj mèt auto's van miense die dao parkere väör van dao-oet te voot te gaon winkele - pardon, te gaon shoppe - in het Outlet. En toch gebäörtj het as ich de gezèt moog geluive. Hordes Duitse shoptoeriste sjpoje zich mèt häör auto's de grens äöver op waeg nao het Remunjs koupparadies, mer ze sjtranje wied van häör besjtumming in ein dörp woeë ze net zoeë min welkom zeen as tachtig jaor geleje.
Det het Outlet ein succes is, is prachtig. Det regelmaotig de toegangswaeg nao het Outlet en zelfs complete dörpe en woeënwieke versjtoptj zitte, is sjanj. Twiëdje Pinksterdaag reje Ellie en ich mèt de fiets nao Mijnheerkens, ónger aan de Maas tösse Remunj en Liëwe. We fietsdje óm ein oër of twië langs de have óm het Outlet haer. Dao zoge we ein bietje van de elenj woeë de miense van Liëwe äöver klage: langs ós sjtóng ein döbbel file vanaaf de have tot aan Liëwe. Oet het dörp bleve auto's kómme die väör häör bezeuk aan het Walhalla van McArthurGlen ein sjluuproute haje gezóchtj door Liëwe.
Det de Remunsje gemaendjeraod mèt häör Outlet groeët haet dörve te dinke, haet de sjtad väöl goods gebrachtj. Dao profitere ouch de dörpe róndjóm Remunj aan weerskenj van de Maas van mét. Mer die besjtuurders vergote väör ouch groeeët te kieke nao de konskwenties van häör planne: zorge väör toegangswaeg die het verkiër aankinne en genóg parkeerplaatse. Det waas väör de sjtad woeë Christoffel, de patroeën van de reizigers, gruets äöver oetkiektj ein brögk te ver. Net wie eine fatsuunlike fietspaad äöver de Maasbrögk. Efeng.
2025, waek 26
