Of ich as liëraar eine bienaam haaj, weit ich neet. Mer wie ich in de jaore zestig as sjtudent op het College in Remunj zoot, haje väöl liërare det waal. Neet èns väör häör oet te sjelje. Die biename wore de sjtuuptrèkkinge van ein traditie die bekans väörbie waas. Ein traditie oet de tied det ouch anger miense as liërare eine bienaam haje, zeker op de dörpe. Det zuus se soms nog trök in doeëjeadvertenties, as ónger de naam van de Burgerlike Sjtandj ouch de bienaam sjteit. As ein saort iëresaluut aan de persoon dae ós haet verlaote. Trök nao het Bussjoppelik College woeë de sfeer van het Rieke Roumse laeve nog opsjteeg oet de vloere van de leslokale.
We haje väöl geistelike as liëraar. De populairste waas Texas Bill (godsdeenst) dae later daeke is gewaore in Sittard. Hae vertèldje det hae ziene naam dankdje aan zien rol as tolk nao de bevrijding. Hae waas toen eine van de wiënige die mèt de soldaote Ingels kóste kalle. De Knoebel waas decaan en ouch geistelik. Dae dankdje ziene bienaam aan ein flinke verdieking in zien gezicht. Het uterlik goof troewes aan miër docente häöre bienaam. De Goudvès (frans), Roeëje Flip (aardrijkskunde), De Naas (aardrijkskunde), De Centebak (ingels), Sjtumpke (hanjelsraekene) of De Bats (nederlands). Väör gesjiedenis haje we De Pispot. Ein verbastering van ziene adelike achternaam. Mèt het waord pispot moke we eine gewuene miens van de geistelik Van Nispen tot Pannerden.
Dan haje we nog twië breurs väör de klas, eine goof gymnastiek, de angere wiskunde, mer det weit ich neet zeker. Väör häör oet ein te haoje, neumdje we de eine De Piemel en de angere Piemel Accent. Eine van die twië waas troewes ouch eine geistelik. Net as De Soep, dae duits goof en nog pesjtoeër is gewaest in Asselt. En dan haje we nog twië liërare mèt de achternaam Coenen. Ze gove allebei nederlands. De eine waas directeur, de angere sjtóng vol väör de klas. Gelökkig mer, want het waas eine goje, zorgzame docent mèt oug väör zien liërlinge. Daomèt haaj hae ziene prachtige bienaam verdeendj: Papa.
2025, week 34
