Pas bewaerdje eine politicus op de televisie aan ein discussietaofel det d'r niks miër dougtj in oos landj. Det äöverdrieve ouch ein kunst is, weite we. Mer det d'r niks miër zooj douge in dit landj, is waal erg äöverdreve. Natuurlik zoje d'r eine houp zake baeter geregeldj kinne waere, mer in welk landj kloptj alles? De man reep neet allein met get. Hae kwoom mèt allerlei väörbeeldje väör zien geliek te bewieze. Natuurlik waas det het bekindj riëmsel woeë klagers altied mèt op de proppe kómme. Det de politiek niks waerd is, want die duit niks aan het sjtiksjtofprobleem, het aanpakke van criminaliteit of energietekort. Dao haet dae man lichtelik geliek in. Mer het väörige kabinet pakdje het sjtiksjtofprobleem zoeë fors aan det anger critici repe det boere gein kans miër krege väör nog aom te haole.
Het is noeët good of het dougtj neet, zag mien moder as we get te knaotere haje. Woeëväör sjloete we politieke kemphane neet op, örges op zölder in ein kesjtiël? Of in de Sixtijnse Kapel, net wie de kardinale. Ze moge d'r pas weer oetkómme as ze ein oplossing väör ein probleem höbbe woeë ze allemaol achter sjtaon. En ouch achter blieve sjtaon. Gaef häör ein äöverlaevingspaket mèt det Marco Kroon haet samegesjtèldj. Dao haet dae ouch versjtandj van, want hae haet d'r pas ein book äöver gesjreve: PARAAT is de titel.
Op dees maneer kan ouch de asielcrisis waere opgelostj. Dao klopdje volges de politieker aan de dicussietaofel ouch niks van. Mer hetzelfde zagte anger politici äöver het beleid van het väörig kabinet. Väör- en taegesjtenjers bie-ein opsjloete, dan kómme de oplossinge vanzelf. Det zoge we waal in Rome. Op dees maneer kinne we ouch het wueningtekort oplosse. Het personiëlstekort äöveral. We kinne d'r de opwörming van de waereldj mèt aanpakke. Ein methode bedinke väör Netanyahu en Poetin op häör plaats te zitte: in de beklaagdjebank van het Internationaal Gerechtshof in Den Haag. Sjloet oos Haagse politieke herriemaekers bie-ein op. Dan zeen we ein pueske van häör verlostj en make ze mesjien, net wie Marco Kroon, eindelik éns get PARAAT.
2025, waek 22
