'Dae van niks kan make, dae kan get,' zag de man naeve mich. Ich begreep hem neet. Ellie haaj de opmerking van dae miens neet gehuerdj. Het sjtóng mèt aope móndj te kieke en te loestere nao eine sjtandjwèrker. We wore op ein mertj in Mesjteech. De verkuiper lag mèt väöl humor en vol äövertuging de zaegeninge oet van ein wónjerdeukske det poetse tot ein fiëst mook. Aolie-, wien-, taoter- fruit- of welke anger plekke ouch, het deukske kós ze allemaol aan. De man leet het zeen. Hae mook zien kleier mèt opzèt sjmaerig, mer het deukske haoldje ouch de ergste nöttigheid in ein hou mou weg. De kiekers haje gelök det ze hem aan het werk zoge, vertèldje de sjpraekbaas. Want hae haaj het alleinrecht op de verkoup. En net vandaag deej hae alles weg mèt 10% korting ómdet de zón sjeen. Waem noe neet koch, deej zichzelf tekort.
Óngertösse haaj ich mich bedachdj waat de man naeve mich haaj bedoeldj. 'Van niks get make,' zag ich taege hem. 'Det kan allein Oos Leef Hiër. As se de Biebel mós geluive. Bedoels se det mèt waat se juust zags?' 'Dan höbs se mich verkiërdj begrepe,' waas zien antjwaord. 'Ich wool zègke det dae mertjman van ein sjtóm sjökske sjtóf mèt hiel väöl wäörd en meriel ein waereldjwónjer wètj te make. Het kwartje veel bie mich. 'Väör van het misversjtandj aaf te zeen zag ich: 'Het is mich get.'
Zien vrouw haaj het gehuerdj en vroog: 'Wèts doe waat mien oma dao vreuger op zooj zègke?' Ich haoldje de sjouwers op. 'Det zaes doe waal, het is mich get. En waas het nog mer get, mer het ís ouch nog niks.' 'En as opa d'rbie waas,' ging de man wiejer, 'kreeg zuuj dao dit antjwaord op trök. Ein versje van väör de pil, op zien plat Remunsj. Het is mich get, het is mich get/ Höbs se ein maedje, dan höbs se gein bed/ Höbs se ein bed, dan höbs se gein maedje/ Höbs se ein maedje èn höbs se ein bed ... /dan kriegtj het maedje later get'.
2024, waek 35
