17 mei 2022ColumnsFrits Criens

Column Modertaal: PROFESSOR, door Frits Criens

Midden Limburg

Jac Wijnands is neet miër. Dit sjtökske is te klein väör zien verdeenste op te neume. Det de kathedraal in Remunj is opgeknaptj mèt prachtige, gebrandjsjiljerdje rame beväörbeeldj, is groeëtdeils aan Jac te danke. Aan zien enorme energie, aan zien kinnis en inzicht, aan ziene wil óm get te bereike. Aan zien talent väör hiel väöl geldj binne te haole. Jac waas eine doezendjpoeët van nivo, mèt groeëte kinnis van religieuze kunst en cultuur. Róndj det thema organiseerdje hae reize nao interessante museums of belangrieke kèrke. Hae waas de gids en zien väörbereidinge wore altied 100%. De verhaole äöver zien kinnis zeen legendaries.

 

De gemaendjeraod van Haelen, woeeë Jac wethaojer waas, ging óm de paar jaor ein weekend nao Wieden in het Schwarzwald. Eine kiër ginge we mèt het besjtuur van Wieden op ekskursie in de sjtad Sankt Blasien nao de domkèrk van Sint Blasius. De gids dao waas van de Duitse Gründlichkeit. Belangrieke feite krege net zoeë väöl naodrök as klein weetjes. Dae man sjèdje mer neet oet. Neet allein ich waerdje doeëdmeug van hem. Aaf en toe probeerdje Jac ouch get te zègke, mer hae waas kansloos. De Duitse gids loesterdje neet èns en kapdje hem gewuen aaf. Op het inj van de róndjleiding wees hae nao drie heiligebeeldje op de breie randj langs de koepel van de domkèrk. Hae keek òs ein väör ein aan en wachdje aeve väör de sjpanning op te veure. Toen kwoom de vraog: ‘Wer sind diese drei Heiligen?’

 

Zien ouge blónke. Hae genaot van de sjtildje die veel. Natuurlik haaj nog noeët emes het antjwaord geweite. En dao zoje die dóm raodsleje van Wieden en Haelen gein verangering in bringe. Hae wool het antjwaord al zelf gaeve wie Jac Wijnands de vinger opsjtook en de gids gein kans goof hem väör te zeen. Wijnands wees nao de beeldje en neumdje de name van de heilige ein väör ein op. De gids trok bleik weg, zoch nao wäörd. Het enige waat hae kós bedinke waas ouch zien excuus väör het feit det hae ziene meister haaj gevónje: ‘Aber Sie müssen Professor sein!’

 

2022, waek 20

 

 

 

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.