Ein ettelike daag nao de Noejaor leep ich ein flink sjtök door het dörp. Natuurlik wis ich det het noejaor waas gewaest. Mer as ich het neet haaj geweite, haaj ich het waal gezeen. Plantsoene, häöfkes, opritte en sjtökke waeg loge vol aafval van al het veurwerk det waas aafgesjtaoke. Hulze van kartón en plestic, doeëze, dueskes, piele en half in de gróndj gegrave flesse wore as sjtil getuge van de fiëstvreugdje achtergebleve. Ich sjtóng d'r eigelik neet bie sjtil wie normaal het liektj det miense häör eige rotzooj neet oprume. Zoeë vanzelfsjpraekendj is det óngertösse. Kérmis- en festivalterreine, sjportvelje woeë groeëte toernoje zeen gehaoje, ze waere dök wie eine voelnisbeltj achtergelaote. Is det fatsuunlik? Nae! Mót dao get taege gedaon waere? Jao! Weit ich waat? Mesjien.
Eigelik besefdje ich de väörige waek pas good waat ich ein paar waeke iërder haaj gezeen. Ich wanjeldje van ós oet nao Nunhem. De zón sjeen en het waas lekker fris wintjerwaer. Nao ein minuut of tiën leep ich mich bie het Herman Meddensplein oet. Det waas nog neet zoeë lang geleje ein versjteindje vlakte mèt parkeerplaatse en aafvalcontainers. Neet bepaoldj ein sjoeënheid väör ein plaats die zèstiën jaor geleje is oetgerope tot het leukste dörp van Limburg. Mer óngertösse haet het Nunhems burgerintiatief Vergroenen Herman Meddensplein d'rväör gezorgdj det het plein ein juweel is gewaore. As het väörjaor begintj te broese, waertj de juweel allein mer sjoeëner.
In mei waertj het plein officieel geäöpendj, verteldje mich eine man van het Burgerinitiatief. Dae waas mèt eine graasraek aan de gang. Het gezón op ein bergske woeë ein kunstwerk op sjteit loog drie waeke later nog vol mèt aafval van aod-op-noew-veurwerk. De troep waas bekans neet weg te kriege. Mótte goodwillendje miense in häöre vrieje tied de rotzooi oprume die angere väör häör plezeer make? vroog ich mich aaf. Nae! De gemaendje dan? Nae, die kan ouch neet alles. Väör het bedriefslaeve geltj: De vervoeler betaaltj. Laot dan väör de partikuleer télle: Alle vervoelers rume op. As jónk en aod det same doon op eine aafgesjpraoke tied, kan det ein gezellig fiëst zeen.
2026, week 6
