’t Aafgeloupe jaor sjreef ich miene column in ’t Limburgs. Sjpeciaal omdet de provincie per 2030 geit veur ’n deil III-erkinning van ’t Limburgs. Ós taal krieg dan dezelfde rechte es ’t Fries en ’t Papiaments in Nederlandj en 130 anger tale in de res van Europa. Ich wól weite wie ich dao zelf eigelik in sjting en daoróm höb ich dao ’n jaor lang euver gesjreve. ’t Aafgeloupe jaor kreeg ich meer laezersreacties dan oojt, gelökkig veural positieve.
Sommige miense vónje’t lestig te laeze, dus kwoom d’r ouch ‘ne gesjpraoke column.
De eige taal sjteit sjteeds hoger op de agenda, dus waerdj ’t tied om door te pakke: van hallo nao hoje.
In de Brainportregio is ónlangs ’n nuuj campange gelanceerd: From Hello naar Houdoe. De brainportregio haet te make mit ‘ne enorm hoge insjtruim van kinnesmigrante van euver de ganse waereld die doorgaons Ingels es veurtaal gebroeke. Dees miense zeen dök vanwaege ASML en aanverwante bedrieve nao Eindhove verhoesd mit ‘t plan om nao ’n paar jaor te vertrèkke. Häör kienjer gaon döks nao ’n ingelstalige sjool en zelf lere ze gein Nederlands. Soms vertrèkke ze inderdaad, mer soms waerd ’n paar jaor get langer en nog get langer en veur se ’t wits, bös se teen jaor wiejer en sjpraeke ze nog sjteeds gein waord Nederlands. Dan kins se diene Eindhovense buurman nog stjeeds neet in ’t Nederlands begroete, of ’n tas koffie in ’t Nederlands besjtelle op ’n terras. De kómmende jaore waerdj d’r nog ‘ne enorme toestruim van expats verwach en daorom is d’r noe dös ’n campagne.
De campagne From Hello naar Houdoe mot de Ingelstalige gemeinsjap in Eindhove aansjpaore om in idder geval ’n bietje Nederlands te lere. Naeve dees informatiecampagne, zeen d’r taalcafés, taalcoaches en taalvriewilligers die de internationals gaon helpe mit ’t lere van ’n wäördje Nederlands. Angers dan beveurbeeld sjtatushaojers, hove expats neet in te burgere. ‘t Is dös aan häör zelf om te bepaole of ze veur hello of houdoe keze.
In Limburg is d’r ouch bès waal get migratie. Naeve miense die oet anger lenj nao Limburg kómme zeen d’r flink get binnelandse migrante. In 2024 verhoesde d’r 46.903 miense vanoet ein anger provincie nao Limburg. D’r vertrèkke ouch väöl miense, dus ‘t totale migratiesiefer is sljechts lich positief. Tóch zeen det d’r al mit al bès vaol die 46.903 op ’n bevolking van 1,3 miljoen. Die nuuj Limburgers kómme beveurbeeld oet de Randjstad, of oet ’t Ooste of in idder geval van ’n plaats wo ze gein Limburgs kalle.
Nuuj Limburgers die succesvol wille Limburgere zeen gebaatj bie väöl taalcontact. Maak van 2026 ’t jaor des se Limburgs geis lere. Es se allein mer in diene villa bliefs zitte mit dien oetsjloetend Nederlandstalige femilie waerdj ’t nooit get mit die nuuj taal. ’t Begint mit ’t menge tösse de lokale bevolking zodet se de taal kins loestere. Gank de sjtraot op beveurbeeld op aodjaorsaovend. Kiek gein ‘oudejaarsconferentie’ mer zit L1 op! Sjrief dich veur 2026 in veur ‘ne cursus Limburgs es tweede taal (LT2). Dae waerdj bienao euveral in de provincie waal aangeboaje.
Es se noe al heel lang hie woons mer eigelik gein Limburgs kals is 2026 ein geweldig jaor om dae sjtap te zitte. ’t Bèste begins se nog op aodjaorsdaag.
Wins ‘ns emes ‘eine goje roetsj’.
Imponeer dien Limburgstalige vrunj door aaf te telle in ’t Limburgs ‘teen, nege, ach, zeve, zes, vief, veer, drie, twee, ein: gelökkig nuujjaor’. Wins de bure ens ’n zalig nuujjaor’ es se boete nao ’t vuurwerk sjteis te kieke. Oefen ouch mit de zinne Waat ein sjitterend vuurwerk en waat ’n slaeg, ’t liek waal oorlog. Of kees veur waat ein geld waerd dao weer de lóch in gesjaote. Bedank de buurvrouw veur ‘dae lekkere waofel’. In Eindhoven höbbe ze From Hello naar Houdoe, laote veer hiej volgend jaor van hallo nao hoje gaon.
O en nog get, es se diene Hollandse buurman vreugs of d’r nog gooi veurnömmes haet en hae zaet: ‘Iech gaaoj plat probiere zu speche,’ sjtaek dan veural diene doem in de lóch en complimenteer ‘m. Sjiek des se det duis. Ziene oetsjpraak is missjiens neet metein perfek, mer dae waerd vanzelf baeter. Eine goje roetsj en hoje!
