Ellie en ich zatte ós in eine hook woeë nog net ein klein taofel mèt twië sjteul vrie wore. We haje ein flink sjtök gewanjeldj en wore aan röst toe. Het terras waas liëlik groeët en aangenaam verwermdj. We deje de jas oet, sjtoke de bein wied van ós aaf en dachte nao äöver oos besjtèlling. De kastelein mook op ein groeët bord reklaam mèt: Heute Hausgemachte Glühwein Party. Ich vroog mich aaf waat d'r Hausgemacht waas, de Glühwein of de Party. Mer det waas natuurlik ein bietje ónnuezel van mich: ederein wis waat d'r bedoeldj waerdje. Wie ich óm mich haer keek, zoog ich det bekans ederein aan de Glühwein zoot. Dae haaj ich al zoeë lang neet mier gedrónke det ich de sjmaak waas vergaete. Dus ich besjtèldje ein glaas en Ellie deej mèt.
Ein paar taofels van ós aaf zoot ein koppel det d'r oetzoog wie Duitse schlagerzengers oet de jaore sestig. Ze vele op vanwaege häör kapsels: blóndj, wied oetgeföhndj en sjtief van de haorlak. Ze trokke väöl bekieks. Dao waerdje op häör gezjwedj en ze haje gein klage äöver aansjpraok. Het ierste glaas Glühwein sjmook hiel erg hausgemacht en het twiëdje glaas precies hetzelfdje as het ierste. We begóste d'rvan te gleuje en de wörmdje trok ós ein bietje nao de kop.
Gans op oos gemaak begóste Ellie en ich get mèt ein te sjmoeze, ein bietje aojerwets hausgemacht.
We vergote vanzelf waat óm ós haer gebäördje. Mer det doerdje neet lang: inéns denderdje keihelle muziek äöver het terras.
We vlaoge allebei rechtop. Achter ós sjtóng ein bakbiëst van ein geluidsbox. Die haje wae äöverzeen wie we ós zatte. Gein wónjer det het täöfelke nog vrie waas gewaest. Links van ós kwoom het schlagerkoppel dansendj op, geklèdj as Tiroler duo. Het publiek begós as eine man mèt te klappe op de maot van de muziek. Het duo zat in: enthousiast, hel en vals: Ein festival der Liebe. We kóste ós taege-ein neet versjtaon, mer begrepe ós ouch zónger wäörd. In krómp plat kwoom het hie op neer: We höbbe ós veerekkig nach Haus gemacht.
2019, waek 49
