Modewäörd zeen ein pueske populair en verdwiene weer oet oos taalgebroek. Ein good väörbeeldj daovan is het waord örges. Ein paar jaor geleje waas det óntzettendj populair. In feite beteikendje het niks. Mer emes dae wool laote huere det hae van wante wis, sjtruidje mèt het waord wie de knechte van Sinterklaos mèt paeperneut. Het bèste waas óm d'r ein bietje lestig én sjlum bie te kieke. Det mook indrök. 'Ich dink det se örges waal geliek höbs.' Of: 'Het klinktj good waas se zaes, mer örges kloptj d'r nog get neet.' Politici en BN'ers beginne mèt ein modewaord en gewuen miense neme het äöver. Det geit via radio, tv en sociaal media. As ederein het gebroektj is de aardigheid d'r vanaaf väör de interessantmaekers en kumtj vanzelf waal get noets.
'Sjtök 'of 'sjtökske' höbbe häöre glorietied achter zich ligke. Toch kóm ich ze nog aaf en toe taege. Pas nog, wie emes vertèldje det hae op vakantie ging väör oet te röste, mer ouch väör ein sjtökske cultuur op te sjnoeve. Miense die zoeë fien weite te formulere zeen kinners die zeuke nao ein sjtök invölling van ein sjtökske persuenlike belaeving. Det haet weer te make mèt ein sjtök creativiteit en ein sjtökske zelfbevestiging. Ein modewaord waat van gein wieke wètj is leuk. Det geit wie ein pandemie door oos taal en haet ederein aangesjtaoke.
Daodoor is Leuk ein haol, laeg waord gewaore. Väöl miese höbbe det neet in de gate as ze leuk zègke, terwiel ze 'prachtig,' 'ingriependj' of 'aangenaam' bedoele. Zoeë höb ich al gehuerdj det de crematie van opa leuk waas gewaest. Op väöl vraoge nao dien meining kins se mèt leuk antjwaorde. Det kan ouch beteikene det se dien iërlike meining neet wils gaeve. Leuk is ein veilig waord väör emes dae zich op de vlake wiltj haoje. Of nörges kal van wiltj make. Dus zègk neet mer allein det se deze column leuk vinjs, dan weit ich eigelik nog niks. Zelf probeer ich leuk links te laote ligke. Det vergaet ich waal èns. Örges is zón sjtökske miscommunicatie mèt michzelf ouch waal leuk.
2025, waek 10
