ColumnsFrits Criens

PIL

Haelen

De aoj vrouw allein aan ein täöfelke sjaof get op mèt häöre sjtool. Ellie en ich ginge zitte. Ze knikdje en keek óm zich haer of d'r bedening in de buurt waas. Zelf haaj ze ein vol tas koffie väör zich sjtaon. Efkes later kwoom ein maedje de besjtèlling opneme. Ellie en ich wole thië. De vrouw vroog ein glaas water. Gewuen kraanwater.

Ze bleef ónröstig óm zich haer kieke, asof ze nog emes verwachdje.

As häöre blik dae van Ellie of mich kruutsdje, lachdje ze effe. Het waas mier grienze. De aojerdom haaj häör gezicht geteikendj tot ein landsjap van ploeëje en broen vlekke. Häör móndjheuk wore ingevalle. Ze droog zilver knuupkes in häör opvallendj groeëte oere.

 

 

Het maedje brach de besjtèllinge. De vrouw zat häör tas koffie naeve het sjuttelke en haoldje ein juweledueske oet häör handjtas. Ze froemeldje aan het sjläötje mer kreeg het dueske neet aop. Ellie mós effe helpe. De vrouw haoldje ein pilke oet het dueske en lag det op het sjuttelke. Ze pakdje häör tas kóffie, reurdje d'r óneinding lang in en drónk d'r aan. Hiel väörzichtig, asof de koffie nog gleujheit waas. Ze zat de tas trök op de taofel en begós weer óm zich haer te kieke. Ellie en ich wore aan oze thië begós.

Ich veuldje mich neet op mien gemaak.

Het leek of de vrouw neet mier in de gate haaj det emes bie häör aan taofel zoot.

 

 

Inèns zoog ze het sjuttelke mèt de pil. Ze sjrók en greep nao häör handjtas. Dees reis kreeg ze het dueske zelf in eine kier aop. Ze pakdje de pil van het sjöttelke en deej die mèt väöl zorg trök in het dueske. Ellie vroog väörzichtig of ze die pil mesjien mós inneme, en wees nao het water. De vrouw sjtook eine vinger op en sjödje van 'nae'. Ze deej het dueske flot trök in häör tas, asof Ellie häör wool dwinge die pil toch te pakke. Wae keke ós vraogendj aan. Gelökkig kwoom efkes later eine man mèt eine aojerwetse gabberdien binne. Ze leet zich röstig door hem mètneme.

 

2019, waek 18

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.