'Ze moorden, heel onaangenaam.' Mèt 'ze' zeen wolve bedoeldj. Eine versjlaaggaever van de Volkskrant sjreef äöver ein demonstratie väör het provinciehoes in Arnhem. Miense protesteerdje dao taege wette die wolve de sjtatus gaeve van 'strikt beschermd'. Mesjien zal det op 7 miërt verangere in 'beschermd'. Mer det is in ein klein landj as det van ós mèt 18 miljoen miense neet genóg. Neet allein väör de miense, mer ouch väör de wolve zelf, zaet eine demonstrant: 'Die (wolven red.) zie je bij ons echt paranoïde door de straten lopen.' Het geveul van ónveiligheid laefdje hiel erg ónger de demonstrante. Ze wore sjoew. Neet allein väör häör vië, ouch väör häör kinjer die op de fiets door de bos nao sjoeël mótte. Die zeen in weie kapot gebete sjäöp ligke. Nogal wiedes det kinjer bang zeen det häör hetzelfdje zal äöverkómme. En neet allein kinjer.
De wolf zal ein sjoeën biëst zeen en leef väör anger wolve. Dao zeen prachtige verhaole en films äöver wolve in groeëte gebiede woeë min miense woeëne. Mer zón gebied is Nederlandj neet. Die verhaole en films gaon hie neet op. Laote we daoväör iërlik zeen.
In oos landj mèt klein sjtökke natuur, mèt väöl miense en vië zeen dees roufdere laevesgeviërlik. Ein dame haaj häöre cocker spaniël mètgenaome nao de demonstratie. Dae hóndj haaj mer drie puet en ze dors hem neet miër los te laote in de haof. Want edere daag lepe d'r wolve bie häör door de buurt en ouch óm häör hoes. Probeer dich èns väör te sjtèlle wie det is. Geis se dan nog op dien gemaak efkes nao het dörp ein boeëdsjap doon?
As d'r eine wolf oet eine dieretuin is losgekómme, waertj groeët alarm gesjlage. Politie, brandjwaer en veiligheidsdeenste rökke oet en miense kriege het advies binne te blieve. Mer wolve die vanoet Duitslandj of Belsj hie haer kómme, kinne besjermdj en óngesjtuerdj häöre gank gaon. Ze vermaorde vië, valle miense aan en loupe op klaorleechte daag tösse de hoeze. We moge häör neet èns wegjage van oze eige gróndj. Waem det sjnaptj is eine knappe. Ich neet.
2025, waek 7
