5 nov 2019ColumnsFrits Criens

VERGAETECHTIG

Leudal

'Ouch nao de dokter?' Ich haaj mich bie de hoesarts net in de wachtkamer gezatte. Zón sjtóm vraog verdeentj ein aeve sjtóm antjwaord. 'Nae, ich kóm twië gebakke vès besjtèlle.' Of zoeë get. Mer ich heel mich in en zag niks. De man van de sjtóm vraog wool gaer aan de kal kómme: 'Ich weit neet woeë ich dich van mótte kinne, mer ich kin dich waal. Doe bès van Haelen, of neet?' Ich knikdje van jao. 'Zuus se waal,' ging hae verder. 'Dan höb ich het toch good. As ich nog effe naodink, kóm ich ouch op diene naam.' Ich besjpaardje hem det naodinke en zag waem ich bèn. 'Ja, nae,' zag hae, 'dan haaj ich het toch good in de kop. Ich zoot al in die richting te dinke. Ze sjtaoke hie troewes good.'

 

Hae mook ziene jas aop en ging wiejer: 'Höbs doe det ouch? Det se get vergaetechtig begins te waere? Väöral mèt name höb ich det erg. Det haaj ich vreuger troewes al. Mer de lètste tied bèn ich dök inèns vergaete waat ich net höb gedachtj. Of waat ich efkes iërder aan emes höb vertèldj. Dan weit ich het waal, mer as ich mich aafvraog woeë het ouch alweer äöver ging, liëtj mien geheuge mich zitte. Neet det ich het kwiet, bèn. Het kumtj neet mier zoeë flot. Ein keteer of ein half oer later is het d'r weer. Mesjien bèn ich get äöver mien toere. Daoväör bèn ich hie.'

 

Hae kós zien verhaol neet aafmake, want ein assistente haaj ein vraog äöver ein formulier. Het probleem van de miens leet mich neet los. Hae leek mich ein sjtök jónger as ich. Äöver dien toere zeen, liektj mich neet fijn. Mer dao kós hae van genaeze en dan waas die vergaetechtigheid lichtelik eweg. Mer as zien probleem noe èns örges angers aan loog? De assistente vertrok weer. Väör de man te sjteune zag ich: 'Dan haop ich mer det de dokter get aan dien vergaetechtigheid kan doon.' Hae keek mich mèt groeëte ouge aan en zag: 'Ich vergaetechtig? Wie kums se dao bie?'

 

2019, waek 45

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.