Ellie en ich haje besjlaote väör mèt de vastelaovendj neet oet te gaon. Twië jaor lang wore we väörzichtig gewaest. We haje ós braaf aan móndjkepkes, angerhalve maeter en al die anger maotregele gehaoje. En we vónje het te riskant óm dan alles in eine kier te vergaete en aojerwets vastelaovendj te gaon vere. Het waas ein besjloet mèt pien in het hert genaome. We haje aevel neet op Iris geraekendj, oos kleindochter die jeugdprinses waerdje van de Foekepotters in Grathem. Natuurlik kóste we de receptie van Prinses Iris neet äöversjlaon. We zoje ószelf, Iris en Prins Daan tekort höbbe gedaon, want ze gove ein prachtig fiëst. Het waas aojerwets gezellig en drök, ederein waas opgelóchtj. Eindelik nao twië jaor weer èns good los. Waem dinktj dan nog aan corona?
Ich mós vanmörge waal aan corona dinke. En ouch aan het beroemdje gedicht 'De tuinman en de dood' van PN van Eyck. Eine Perzische tuinman is in de haof van ziene baas aan het wèrke. Inèns sjteit Magere Hein väör hem. De tuinman rentj nao ziene baas en vreugtj ein paerd. Hae wiltj vluchte nao Ispahaan väör zien noeëdlot väör te zeen. Magere Hein vreugtj aan de baas: 'Waat is mèt diene tuinman loos?' 'Woeëväör liëts doe dae erme miens zoeë sjrikke?' vreugtj dae baas aan Hein. 'Ich leet hem neet sjrikke,' verdedigtj Magere Hein zich. 'Ich sjtóng d'r allein van te kieke det ich hem hie zoog wèrke, ómdet ich hem vanaovendj mót ophaole, wied eweg, in Ispahaan.'
Haet det verhaol get mèt de vastelaovendj te make? Ein bietje waal mer dan angers. Ellie en ich haje ós twië jaor braaf gehoektj väör het coronavirus. Wae kómme väör het ierst weer echt ónger de miense en waat gebäörtj d'r? Drie daag nao die prachtige receptie duit Ellie väör de zekerheid ein zelftest. De oetsjlaag is positief. As ich dit sjrief, ligktj het mèt kop- en kaelpien in bèd en as het mót hooste duit ziene rögk flink pien. Cas, het breurke van de prinses haaj pas corona gehadj, mer haet het weer. En ich? Ich klop het aaf.
2022, waek 10
