Ellie en ich móste in Tienray zeen, de miense dao neume häör dörp Tiendere. Net wie Heitse haet Tiendere eine bienaam dae verwiestj nao ein beroemdje plaats. Heitse neumtj zich Klein Paries en Tiendere wiltj doorgaon väör Klein Lourdes. Väör Ellie en mich is det sjtök van de provincie eine tamelik ónbekindje hook. We zeen waal èns in de Maasduine gewaest. Det is dan ouch alles. As we wiejer weg in Limburg gaon fietse of wanjele, ligktj het Zuide miër väör de handj. Mer we móste noe toch dae kantj oet, dus Ellie wool de fietse mètneme achterop de auto. Det waas gein verkiërdj idee. De Maas sjtruimtj door het gebied en woeë die in de buurt is, is het altiëd sjoeën. Dus Ellie haaj róndj en langs de Maas aan weerskenj ein route oetgezóchtj.
Het waas eine prachtige fietsdaag. Ómdet de vakanties väörbie zeen, waas het neet drök op de fietspaej, eigelik wore d'r allein mer babyboomers óngerwaeges. In Arcen ginge we het vaer äöver. Dao reje we ós oet bie de broewerie van Hertog Jan. In het veldj tösse die broewerie en de Maas höb ich bekans sestig jaor geleje mèt mien vader en eine naef gewèrktj väör eine roeëzekweker oet Lottum. Mer det is ein anger verhaol. Óngerwaeges kwoom ich plaatsname taege wie Wellerlooi, Meerlo, Swolgen, Broekhuizen en Blitterwijck. De opgank nao de brögk in Wanssum waas ein ervaring apaart. Äöver eine lange, bochtige waeg waerdje wae van óngeroet nao baove gelèdj nao eine breije en veilige fietspaad.
Het waas ein röstgaevendje ervaring väör zoeë de Maas äöver te sjtaeke. Ellie en ich dachte hetzelfdje. 'Waat ein waeldje väör fietsers, die maasbrögk in Wanssum. En waat ein elenj väör fietsers, die k**maasbrögk in Remunj.' Dao bès se as fietser, zeker in de zomer, vogelvrie. De ruumdje is al sjmaal mer mót ouch nog èns gedeildj waere mèt hiël versjillendj verkiër wie fatbikers, elektriese scooters, onzeker e-bikers, vootgengers met wichter en hunj, fietsers mèt väöl bagaasj aan weerskenj van de fiets en illegaal taegeliggers. Sjanj! Remunj sjteit op de kaart. Mèt de geviërlikste brögk äöver de Maas.
2024, waek 37
