Ellie en ich lepe oos coronarundje door het Luedaal. Sjtaags te väöre waas het gedoons op de Dam gewaest woeë miense väöl te dun op ein haje gesjtange. Angerhalve maeter: ouch as se neet aan het demonstrere bès, is het is neet altied gemaekelik väör dae aafsjtandj in iëre te haoje. Mer hie haje we net zoeë väöl angerhalf maeters as we wole väör ós allein. Op ein gegaeve moment lepe we ós aeve good bekans taege eine man op dae oet ein ónverwachts paedje van rechts kwoom. Hae droog ein korte sjportbóks mèt ein T-shirt en waas mager, opvallendj mager. Toch zoog dae miens d'r gezóndj oet. Ich realiseerdje mich det se allewiel bekans gein mager miense mier zuus. In miene kinjertied wore d'r hiel väöl, al zooj deze miens ouch toen al te mager zeen gewaest.
Det waas ich as kindj ouch, volges mien moder. As ich neet flot zjwaorder waerdje, mós ich van de sjoeëlarts in de groeëte vakantie nao de papkolonie in Bunde. De nonne dao zoje mich in ein paar waeke waal èns liëre aete: väöl pap en sjmiddes sjlaope. Dae kwaoje opzat van de dokter en mien moder höb ich grandioos laote mislökke, mer det is ein anger verhaol. Efeng. Oos dialecte höbbe väöl wäörd väör mager miense, in de meiste klinktj aafkäöring. Eine sjregkedek is ein aegerst, mer ouch emes dae te mager is. Ein sjarminkel is ein óngerkómme paerd, mer ouch eine magere miens.
As se get kilo's te min op de bascuul brings, bès se al gouw eine knaokeridder.
Sjmaalbetser, väör aan te gaeve det emes te min vleis op de batse haet, klinktj get vruntjeliker. Det geit neet op väör ein paar wäörd die väöral väör mager vrouwe waere gebroektj. In Mofert hètj ein maedje det klein en mager is ein sjräökelke. Hie zoje ze dao euzelke taege zègke. Det ging mich allemaol door de kop wie Ellie en ich dae miens väörbie lepe. Ich haaj mich sjmörges net gewaogdj. Ein dink waas zeker: ich hoofdje neet nao de papkolonie. 'Coronakilo's,' zag ich. Mer Ellie heel het op: 'Trappistekilo's.'
2020, waek 25
