'5 mei, Bevrijdingsdaag: Vrijheid is dat je kunt doen wat je wilt.' Det zag ein kindj van ein jaor of zès taege eine reporter van de tv wie dae vroog waat vrieheid is. Het klónk sjattig en vol äövertuging en de reporter waas zoeë content det hae neet doorvroog. Twië giebelendje maedjes van ein jaor of zevetiën lekdje aan ein ieske en haje dezelfde meining äöver vrieheid as det wicht: vrieheid is det se kins doon waat se wils. Det antjwaord kwoom in die oetzending nog versjillendje kiëre väörbie. Ouch oetgesjpraoke door aojer miense, manne en vrouwe, die baeter zoje kinne weite. En geine kiër vroog eine van de reporters door. Zoje die neet sjlummer zeen?
Ein paar daag iërder waas op Käöningsdaag ein vrouw verkrachtj. Door eine man. Op klaorleechte daag. Op de Keizersgracht in Amsterdam. Tösse het volk. Manne sjtónge het misdrief te filme en zatte het op internet. Vrouwe höbbe het slachtoffer mótte redde. Det kries se as se dinks det vrieheid väör dich beteikentj det se kins doon waat se wils. Gelökkig wore d'r vrouwe die häör versjtandj waal gebroekdje. Die deje daomèt mesjien neet waat ze per se wole, mer waal waat ze op det moment móste doon.
'Doon waat se wils' liektj het laevesmótto van deze moderne tied. De waereldj drejt óm mich. As ich mer kan genete ... ich, ich ich. Ich bèn d'r väör michzelf. Det bekrómpe ich-geveul kumtj trök in reklamesjpotjes, in het gedraag van miense in de aopebaar ruumdjes. Het oeteinvalle van het vereinigingslaeve is d'r ein symbool van. Wie kómme miense d'rbie det vrieheid hetzelfdje is as 'kinne doon waat se wils'? 'Het geit ós te good,' zag emes. Zooj det het zeen? Of mótte we dudeliker oetligke det 'kinne doon waat se wils' allein mer kan as se anger miense, de samelaeving en het algemein belang gein sjaaj duis? Vrieheid besjteit allein binne de norme van fatsoen en respect. Ze is d'r neet allein väör dichzelf mer väör allemaol. Det is de vrieheid die we, mèt eine opgesjtaoke doem nao de geallieerdje, het gans jaor wille vere.
2025, waek 20
