Ellie en ich ginge fietse róndj de Mienwaeg. De vakanties wore väörbie, dus kóste seniore mèt ein get gerösjder hert de waeg op. De meiste eigeniere van fatbikes en anger sjnel fietse zote op sjoeël of wore bie de baas aan het werk. Ouch wore d'r gein groeëte troebe 'wielrenners' die al van ver beginne te kake 'aan de kantj'. Waat bezeeltj die viërtig-plussers toch die van zichzelf dinke det ze de Tour nog kinne winne, mer het neet nuedig vinje väör ein bel van ein paar euro op häöre deure fiets te zitte, net wie anger fietsers. 'Det mós gewuen verplichtj waere, vinjs se ouch neet?' vroog ich aan de renner dae efkes iërder mèt eine vruntjelike 'gojendaag' op het terras aan het täöfelke naeve Ellie en mich waas gaon zitte. We wore zoeë mer toevallig aan de kal gekómme äöver het waer.
De man reageerdje mèt ein taegevraog. 'Waat bezeeltj de gries golf op häör elektriese fietse? De meiste rieje väöl helder as väör häör verantjwoordj is. As d'r inèns get gebäortj en ze flot mótte reagere, kinne ze de situatie neet aan. Ómdet ze te traog zeen mèt häör reactie, of neet genóg contraole höbbe äöver het sjtuur. De hèlftj zitj ónzeker op de fiets en rietj midde äöver de fietsepaad ómdet ze ein bietje sjlingere. Wae wielrenners höbbe teminste nog eine helm op. Mer wieväöl miense van dien generatie drage d'r geine? Väöl aoj luuj höbbe waal commentaar op alles ein ederein, mer zelf ein good väörbeeldj gaeve? Det kumtj neet bie häör op.'
Hae wreef mich det allemaol hiel netjes en röstig ónger de naas. Ich wees nao oos helme, mer natuurlik haaj hae väör ein deil geliek en det goof ich hem ouch. 'Mer,' zag ich, 'waat ich net bewaerdje, is daomèt neet minder waor.' Hae knikdje. 'Ouch det kloptj. Mer volges mich mót d'r iërst väör 75-plussers ein helmplicht kómme en ein verplichtj fietsbewies mèt mediese käöring.' Det waas nogal get. Ich sjrók d'rvan. 'Iërst?' vroog ich. 'En dan?' 'En dan ein verplichdje bel väör wielrenners. Bès se det mèt mich èns?'
2025 week 37
