'Frits en Ellie, goede gezondheid en het allerbeste voor 2025 met groetjes uit Brisbane.' Die gooj winse krege we per mail van Tjeu Theunisse, 93 jaor, oet Australië. Hae vertèltj det het good met hem geit en det hae bekans alles nog zelf duit. Tjeu kumtj oet Bieëgdje. Nao de aorlog is hae as jónge kaerel geëmigreerdj. Ich wis neet van zien besjtaon, tot ich in 2018 eine mail van hem kreeg. Hae haaj gehuerdj äöver Vossen van de Spik. Dao wool hae miër äöver weite. Woeëväör? Hae waas in de aorlog as jóng van dertiën oet Bieëgdje geëvakueerdj nao de Busjop in Heitse. Dao woeëndje Lei en Trui Theunissen, aome en tante van hem.
Bie eine razzia waas Piet Vossen, zoon van Moder van de Sjpik, besjaote en gevluchtj, richting de Busjop. Det haaj Tjeu van doonbie mètgemaaktj. Hae waas zelfs de kaplaon van Heitse gaon haole, voor Piet de lètste sacremente te bringe. Tjeu vónj het erg det hae Vossen van de Sjpik mós misse, hae waas net väör de oetveuringe al in Limburg gewaest. Ellie en ich höbbe toen mèt hem gekaldj. Hae wis nog precies te vertèlle wie het d'r op de Busjop haaj oetgezeen. Woeë tanks haje gesjtange, de hóndjskoeëj waas gewaest. Oos kòntact waas al apaart, mer waerdje nog apaarter. In 2023 kwoom weer eine bezunjere mail van Tjeu oet Brisbane woeë hae Matt hètj. Hae haaj gehuerdj van mien toniëlsjtök äöver de sjtuw van Lin, De vlook van Osen.
Dees reis wis Tjeu väöl äöver Osen. Hae sjtuurdje zelfs ein foto van kesjtiël Osen. Häör boerderie aan de Bieëgdjer kantj van Osen waerdje op het lètst van de aorlog vanaaf de angere kantj van de Maas besjaote door de nazi's. Aan dae kantj ligktj ouch de Linner sjtuw. De familie Theunissen mós vluchte en zoeë kwoom Tjeu op de Busjop terecht. Wie bezunjer: de aorlog bringtj twië van mien groeëte toniëlsjtökke in eine miens oet Brisbane bie-ein. Dae Australiër mèt het hert in Midde-Limburg winse Ellie en ich in zien Modertaal ein Zalig Kerstmis en ein Zalig Noejaor. Ich haop names uch allemaol.
2024 waek 52
